მარკეტინგული კვლევა, როგორც ბიზნესის წარმატების წინაპირობა

„რას ამბობენ ჩვენს კამპანიაზე, ამომიყარე კომენტარები.“

„მითხარი, ყველაზე ხშირად რა შეკითხვას სვამენ მომხმარებლები.“

„სოც.ქსელში ჩვენზე უფრო მეტი კარგი იწერება თუ კონკურენტზე?“

დღემდე ამ ყველაფერს მარკეტინგის სამსახური, ერთი ან რამდენიმე ადამიანი ხელით აკეთებს. ეს მაშინ, როდესაც მსგავსი ანალიზის ავტომატიზაცია social listening-ის საფუძველზე სავსებით შესაძლებელია და 1 თვის შრომა შეიძლება 1 საათში, ადამიანის მინიმალური ჩართულობით შესრულდეს. როგორ?

minds&marketing-ში ყოველთვის ვსაუბრობთ მარკეტინგული კვლევის აუცილებლობაზე. პლატფორმაც ხომ სწორედ ამ დანაკლისის შევსების, მონაცემებზე დაფუძნებული ცოდნისა და გამოცდილების გაზიარების მიზნით შეიქმნა. დღეს კი მარკეტინგული კვლევის მნიშვნელობასა და გზებზე Hapttic-ის მაგალითზე მოგიყვებით.

 

როგორც ადრე გითხარით, ჩვენ პარტნიორები გავხდით და გასული თვის შემაჯამებელ სტატიაში სწორედ მათ მიერ დამუშავებული მონაცემები გამოვიყენეთ. დღევანდელ სტატიაში კი კომპანიის თანადამფუძნებელი და აღმასრულებელი დირექტორი, ელენე ბიბილეიშვილი გაგვიზიარებს როგორც Hapttic-ის შესაძლებლობებს, ისე კომპანიების გამოწვევებსა და გადაწყვეტებს.

 

რა მნიშვნელობა აქვს მარკეტინგულ კვლევას?

მარკეტინგული კვლევა წარმოადგენს მონაცემების სისტემურ შეგროვებას, ანალიზსა და ინტერპრეტაციას, რომლის მიზანია ბაზრის, მომხმარებლის ქცევისა და კონკურენტული გარემოს სიღრმისეული გააზრება. მიღებული მიგნებები ბიზნესს ეხმარება ეფექტური სტრატეგიის ფორმირებაში, სწორი გადაწყვეტილებების მიღებასა და მარკეტინგული ბიუჯეტის ოპტიმიზაციაში. დღეს, როცა უამრავი ციფრული არხი და არაერთი AI პლატფორმა არსებობს, იმდენად ბევრი მონაცემი იყრის თავს, რომ წარმოუდგენელია ეს ყველაფერი ხელით, კონკრეტული ადამიანისა თუ გუნდის მიერ კეთდებოდეს (თუმცა კეთდება, დიდი დროისა და ფინანსების ხარჯზე).

რაც დრო გადის, უფრო და უფრო რთული და ძვირი ხდება ადამიანის ყურადღების დაჭერა. ახლო წარსულში გიყვებოდით, რამდენად განსხვავდება მომხმარებლის ქცევა თაობების მიხედვითაც კი, ყოველ მომდევნო დღეს მეტი გამოწვევა მოაქვს, ცვლილებებიც სწრაფად ხდება; ამ დროს კრიტიკულად მნიშვნელოვანია ბიზნესმა აუდიტორიის მოთხოვნებს ყოველთვის დროულად და ადეკვატურად უპასუხოს. სწორედ აქ შემოდის მონაცემებზე დაფუძნებული გადაწყვეტილებების მნიშვნელობა.

ელენე ბიბილეიშვილი, Hapttic-ის თანადამფუძნებელი და აღმასრულებელი დირექტორი:

„მონაცემებზე დაფუძნებული მარკეტინგი დღეს ნიშნავს გადაწყვეტილებების მიღებას არა ინტუიციისა და სუბიექტური შეფასებების, არამედ რეალური მონაცემებისა და ანალიტიკის საფუძველზე. პრაქტიკაში არაერთი შემთხვევა გვქონია, როდესაც კომპანიებს ეგონათ, რომ სწორ სტრატეგიას მიჰყვებოდნენ, თუმცა კვლევამ სრულიად განსხვავებული სურათი აჩვენა.

მაგალითად, ერთ-ერთ პროექტში ბრენდი კონკრეტულ ქივორდებზე აკეთებდა ფოკუსს, ხოლო კვლევის შედეგად აღმოჩნდა, რომ მომხმარებლები იმავე პროდუქტსა თუ ობიექტს სრულიად განსხვავებული ტერმინებით ეძებდნენ. დღეს მომხმარებლის ყურადღება ერთ-ერთი ყველაზე ღირებული რესურსია, რის გამოც ბიზნესებს აღარ აქვთ იმის ფუფუნება, გადაწყვეტილებები მხოლოდ ინტუიციაზე დაყრდნობით მიიღონ.

 

 

თანამედროვე მარკეტინგში კონკურენტული უპირატესობა სწორედ მონაცემების სწორ ანალიზსა და მათ საფუძველზე მიღებულ სტრატეგიულ გადაწყვეტილებებზე გადის.”

 

რა მონაცემები აინტერესებთ კომპანიებს?

ერთჯერადი კვლევა თუ გრძელვადიანი დაკვირვება, კონკრეტული დროის პერიოდი, სოციალური მედიის ყველა არხი, საიტები, ფორუმები, AI  პლატფორმები და ყველაფერი, რისი ციფრული დომეინიც არსებობს – AI-ზე დაფუძნებული მარკეტინგული ანალიტიკის პლატფორმა Hapttic ყველაფერს იკვლევს, რაც კომპანიას კონკრეტულ შემთხვევაში სჭირდება. და არამხოლოდ იკვლევს, არამედ ყველა მარკეტინგულ მონაცემს ერთ სისტემაში აქცევს და კომპანიას კონკრეტული მიგნებებითა და რეკომენდაციებით უბრუნდება.

ელენე ბიბილეიშვილის თქმით, კომპანიები ყველაზე ხშირად სამი მთავარი საჭიროებით მიდიან Hapttic-თან: კონკურენტების ანალიზი, უარყოფითი  გამოხმაურებების კვლევა და მონაცემების მიღების სისწრაფე. ქვევით განვიხილავთ ამ და სხვა სერვისებს:

კონტენტის ანალიზი ძირითადად კამპანიის ჭრილში გამოიყენება. უთითებენ კონკრეტულ დროის პერიოდს, არხებს და პოსტებს. ხელოვნური ინტელექტი კომენტარების ანალიზსაც აკეთებს, ხოლო, თუ კონკურენტების არხებიც ჩართულია, „კროს ანალიზის“ საფუძველზე კონკურენტის კამპანიასაც აჯამებს, გამოხმაურებებს ერთმანეთს ადარებს და ამის მიხედვით მიგნებებსა და რეკომენდაციებს წერს. მაგალითად, სატელეკომუნიკაციო კომპანიები რომ ავიღოთ: თუკი კონკურენტის კომენტარში ვიღაც წერს, რომ 1-დღიანი ულიმიტო ინტერნეტი არ მოსწონთ, შეიძლება მისი კონკურენტისთვის ხელჩასაჭიდი აღმოჩნდეს და მეტდღიანი პაკეტი დაამატოს.

სოციალური მედიის არხებისა და სხვა საიტების გარდა ინფორმაციის წამოღება შეუძლიათ შიდასაკომუნიკაციო პლატფორმებიდანაც, რაც ინბოქსის ანალიზის შესაძლებლობას იძლევა – რამდენი შეტყობინება შემოდის ყოველდღიურად, ძირითადად რა შეკითხვით მიმართავენ, ოპერატორების მუშაობის ხარისხი როგორია და ა. შ. ინბოქსის ანალიზს აქტიურად ირჩევენ, მაგალითად, სასტუმროები, რადგან ჯავშნებზე მოთხოვნა ხშირად სწორედ ინბოქსში შედის.

ასევე მოთხოვნადია სენტიმენტის ტიპი. როგორც ელენე ამბობს, კომპანიებს განსაკუთრებით უარყოფითი გამოხმაურებები აინტერესებთ და ასევე აქტიურად შემოდის დროის საკითხიც:

„ბიზნესმა იცის, რომ რაც უფრო მალე დააიდენტიფიცირებს პრობლემას, მით სწრაფად შეძლებს გამოსწორებას. ამიტომ მოთხოვნა იზრდება მონაცემების არა მხოლოდ მიწოდებაზე, არამედ სწრაფად მიწოდებაზე. ხელოვნური ინტელექტი შესაძლებლობას გვაძლევს კვლევის ნაწილი მაქსიმალურად ავტომატიზებული იყოს და 1 თვის საქმე 1 საათში შესრულდეს,“ – ამბობს ელენე.

 

ტრადიციული კვლევის მომავალი

შესაძლოა არც ისე შორს იყოს დრო, როდესაც AI კვლევა ტრადიციულ კვლევას სრულად ჩაანაცვლებს, თუმცა დღეს ორივე მეთოდი გამოიყენება. და აქვე ჩნდება კითხვა: რამდენად სანდოა AI-ზე დაფუძნებული კვლევა?

ელენე ბიბილეიშვილი, Hapttic-ის თანადამფუძნებელი და აღმასრულებელი დირექტორი:

„AI მიმართულებით სკეპტიკური დამოკიდებულება ჯერ კიდევ არსებობს და ხშირად გვეკითხებიან, პროცენტული აცდენა რამდენია, ადამიანის ჩართულობა როგორია და ა. შ. დღეისათვის 97-98%-იანი სიზუსტე გვაქვს, ჩვენს სისტემას იუმორიც ესმის, სარკაზმიც, ირონიაც. თუმცა მაქსიმალური სიზუსტისთვის ჩვენი მხარდაჭერის გუნდი 24/7-ზე კონტაქტზეა დამკვეთთან, თითოეულ კომპანიას მიმაგრებული ჰყავს თავისი მენეჯერი, რომელიც რეპორტის გაგზავნამდე ეცნობა სრულ ინფორმაციას.“

ელენეს თქმით, რაოდენობრივ კვლევას AI უკვე სრულყოფილად უმკლავდება, მთავარია საკმარისი ინფორმაცია და სწორი კონტექსტი ჰქონდეს. Hapttic-ში ზუსტად ახლა მუშაობენ market research-ის ცალკე მოდულზე, რომელსაც სრულად AI უზრუნველყოფს და მაქსიმალურად შეამცირებს ადამიანის ჩართულობას მარკეტინგული კვლევის პროცესში:

„მაგალითად, კეთდება აპლიკაცია, სადაც მომხმარებელი შეძლებს ექიმთან ონლაინ კონსულტაცია დაჯავშნოს. აინტერესებდათ, ტელემედიცინის მიმართულებით რა ხდება, რა აწუხებთ მომხმარებლებს, რა შეკითხვები აქვთ, რომელ აფთიაქებს ირჩევენ, სად, ვისთან, როგორ ეძებენ რეკომენდაციებს და ა. შ. გავაკეთეთ 200 მონიტორინგის/კვლევის კამპანია, 1500 ქივორდით ვეძებდით, 175 ათასზე მეტი პოსტი დავამუშავეთ მთელ ინტერნეტსივრცეში. და ეს ყველაფერი მინიმალური ადამიანური ჩართულობით.“

თვისობრივ კვლევას ჯერ კიდევ სჭირდება ადამიანის ჩართულობა, რადგან ინტერვიუ, ფოკუსჯგუფი განსაკუთრებით ღრმა ადამიანურ კონტექსტს მოითხოვს, თუმცა მომავლის პერსპექტივაში არ არის გამორიცხული ესეც ხელოვნურმა  ინტელექტმა უზრუნველყოს.

 

შეჯამებისთვის

მარკეტინგული კვლევა ბიზნესის წარმატების ერთ-ერთი მთავარი წინაპირობაა და ვინც მას იყენებს, რამდენიმე ნაბიჯით ყოველთვის წინ არის. ელენემ ინტერვიუს დროს არაერთი კომპანია დაასახელა, რომელიც Hapttic-ის სერვისებს იყენებს, რაც მაფიქრებინებს, რომ მარკეტინგული კვლევების მიმართულებით მდგომარეობა ნამდვილად უმჯობესდება.

ინტერვიუს ბოლოს ელენეს ვკითხეთ, რას ეტყოდა კომპანიებს, რომლებიც ჯერ კიდევ კვლევის გარეშე მუშაობენ, მან გვითხრა:

„ბევრი ბიზნესი დღეს ბაზარს ჯერ კიდევ „დახუჭული თვალებით“ უყურებს – შესაძლოა, ჰქონდეს ძლიერი პროდუქტი და ეფექტური კამპანიების განცდაც, თუმცა, თუ აუდიტორიის რეალურ საჭიროებებსა და ქცევებს არ უსმენს, დროთა განმავლობაში აუცილებლად დაშორდება ბაზრის მოთხოვნებს. ჩემი აზრით, თანამედროვე ბიზნესში ყველაზე მნიშვნელოვანი სწორედ მონაცემებზე დაფუძნებული აზროვნებაა – უნარი, გადაწყვეტილებები მიიღო არა ვარაუდების, არამედ მომხმარებლის რეალური ქცევის, უკუკავშირისა და ბაზრის ანალიზის საფუძველზე.“

ჩემი მხრივ დავამატებ, რომ კვლევა და ამ კვლევის ოპტიმიზაცია სტრატეგიისთვის, შემოქმედებითი აზროვნებისთვის მეტ დროს დატოვებს. შესაბამისად, ჩვენც უფრო დიდი და საინტერესო მასალა გვექნება დასამუშავებლად.