ბრენდების თვალით დანახული ქალი

წინა სტატიაში გიყვებოდით, როგორი იყო ბრენდების თვალით დანახული დედა, დღეს კი დროა 8 მარტის ვიდეოები შევაჯამოთ.

 

ამ ვიდეოებში ბევრი რამ ვნახეთ: სტერეოტიპები და მათი დამსხვრევის მცდელობა, ოჯახის და საზოგადოებრივი როლების მრავალფეროვნება, ყველა ასაკისა თუ პროფესიის ქალი. რაც ნამდვილად შესამჩნევია, წელს არ გვინახავს ვარდისფერი, არც ყვავილების დომინანტობა და სხვა სტერეოტიპული მიდგომები, რომლებსაც გასულ წლებში ხშირად ვხვდებოდით. ეს იმას ნიშნავს, რომ ბრენდების მიდგომა იხვეწება და სტერეოტიპების გამყარებიდან მათი დამსხვრევის მცდელობამდე მოვედით.

 

საბოლოოდ, ნანახი ვიდეორგოლები რამდენიმე კატეგორიად გავაერთიანეთ და გიყვებით, რა სოციალური გზავნილები აქვთ ბრენდებს ამჯერად და საერთოდ, როგორია 2026 წელს მათი თვალით დანახული ქალი.

 

ქალებთან დაკავშირებული სტერეოტიპების მსხვრევა – ზუმერი, მიდეა, თეგეტა

zoommer x supermarket agency – ქალი ყოველდღე აღსანიშნავია

ზუმერის წლევანდელი ვიდეო, ფაქტობრივად, შარშანდელის სიქველია. თუკი შარშან სლოგანი იყო „ყველა ქალი აღსანიშნავია“, წელს მთავარი სათქმელი კონკრეტულ დღეს დაუკავშირეს და დასვეს შეკითხვა: „ქალთა დღე უნდა არსებობდეს?“ აქედან წამოვიდა ახალი სლოგანიც – „ქალი ყოველდღე აღსანიშნავია.“

ვფიქრობ, შარშანდელი ნანახი რომ არ გვქონოდა, წლევანდელი ისეთივე ძლიერ ემოციურ ზეგავლენას მოახდენდა, როგორიც წინა კამპანიამ მოახდინა. თუმცა, მეორე მხრივ, დასაწყისში დასმული შეკითხვა იმდენად აქტუალურია, რომ მასზე ჩაჭიდება და დანარჩენ 364 დღესთან დაპირისპირება მაინც კარგი სვლაა.

ძლიერი და დამაფიქრებელი სთორითელინგი, შარშანდელის მსგავსად არა ადამიანებზე, არამედ არსებულ გარემოზე ხაზგასმა, რომელიც გაცილებით მხარდამჭერი უნდა იყოს, მინიმუმ, არახელისშემშლელი მაინც – საბოლოოდ, supermarket-ის ხმა აშკარად ისმის.

 

მიდეა x supermarket agency – სახლის საქმე საერთო საქმეა

supermarket-მა მიდეასთვისაც სტერეოტიპების თემა შემოიტანა – ამჯერად არა ზოგადი, არამედ კონკრეტული, ყველაზე გავრცელებული სტერეოტიპის, რომლის მიხედვითაც სახლის საქმე ქალის საქმეა. ამის საპირისპიროდ, სააგენტომ გვითხრა: „სახლის საქმეები უსასრულოა, შესაბამისად, მათ ერთი ადამიანი არ უნდა ასრულებდეს“.

იმის გათვალისწინებით, რომ წლების განმავლობაში ტექნიკის ბრენდები მხოლოდ ქალებს ელაპარაკებოდნენ, მიდეას გზავნილი (მისივე ტექნიკის ინტეგრაციით) არის იმის ჩვენების მცდელობა, რომ სარეცხი მანქანა, ყავის აპარატი თუ სხვა ტექნიკა მხოლოდ ქალის ნივთი კი არ არის, არამედ – ოჯახის საერთო ინსტრუმენტი.

 

თეგეტა x JoyBoy Creative Studio – ქალი მართავს

თეგეტას გზავნილიც პასუხია სტერეოტიპების მიმართ, განსაკუთრებით იმასთან დაკავშირებით, რომლის მიხედვითაც „ქალი საჭეს ვერ მართავს“ და პროფესიები სქესის მიხედვით იყოფა, მაშინ, როცა ქალს შეუძლია ყველაფერი მართოს და ყველაფერი  იყოს: სატვირთოს მძღოლი, დიჯეი, ფოტოგრაფი, ოქრომჭედელი, მეშახტე, რეინჯერი, მწყემსი... და კიდევ მრავალი სხვა.

თეგეტას ვიდეორგოლში 20 განსხვავებული (მათ შორის, სტერეოტიპის მიხედვით – არაქალური) პროფესიის ქალის ჩვენება არის არა მცდელობა, არამედ მტკიცება იმისა, რომ ქალს შეუძლია წარმატებული იყოს ნებისმიერ პროფესიაში. და ეს ყველაფერი ძალიან ძლიერი სთორითელინგით, რომლის ავტორი დიანა ანფიმიადია.

აქვე აღსანიშნავია სიტყვების თამაში – სლოგანში სიტყვას „მართავს“ ორმაგი დატვირთვა აქვს – ერთი მხრივ, ის პირდაპირაა დაკავშირებული ავტოინდუსტრიასთან (საჭის მართვა), მეორე მხრივ – ლიდერობასთან, პროცესების მართვასა და გადაწყვეტილებების მიღებასთან. საბოლოოდ კი მივდივართ დასკვნამდე: თუკი ქალი ამდენ რამეს მართავს – ემოციებს, დროს, ოჯახს, კომპანიას – მანქანას როგორ ვერ მართავს?!

 

თავის მოვლის საშუალებებიდან რეალურ ღირებულებებამდე – PSP, GPC

PSP x playmakers – რა სჭირდებათ ქალებს ყველაზე მეტად?

PSP-ის შარშანდელი ვიდეორგოლი გახსოვთ? თუ არა, მე გაგახსენებთ: „რომ შეეძლოს, ჩემი შეყვარებული 8 მარტს ამ სუნამოს მაჩუქებდა, მამაჩემი ამ კრემს...“ ვიდეოში ქალის ხმა სხვადასხვა პროდუქტს ჩამოთვლიდა, ბოლოს კი ამბობდა: „მე ქალთა დღეს ვერ მომილოცავთ, რადგან მე (პაუზა) არ დავბადებულვარ“. სელექციური აბორტის წინააღმდეგ მიმართული ვიდეორგოლი შარშან ბევრმა გააკრიტიკა, ზოგი ემოციურ მანიპულაციაზეც კი საუბრობდა და ფიქრობდა, რომ კომპანიამ მგრძნობიარე საკითხი თავისი პროდუქტების რეკლამისთვის გამოიყენა.

აი, წელს კი იმავე სააგენტოსგან სრულიად საპირისპირო ვიდეო მივიღეთ, არც ვარდისფერი, არც თავის მოვლის საშუალებების ჩვენება, პირიქით – წელს PSP-მ გვითხრა: „რაც ქალებს ყველაზე მეტად სჭირდებათ, ჩვენთან ან იყიდება“, ანუ ფინანსური დამოუკიდებლობა, მისი არა რომ რად ისმოდეს, ოჯახში ზრუნვის გადანაწილება, მეტი გამოძინება, მემკვიდრეობის თანაბარი განაწილება, პროფესიების სქესის მიხედვით არდაყოფა და სხვ. ცალკე აღნიშვნის ღირსია Plot twist, რომელიც უკვე playmakers-ის ხელწერად ჩამოყალიბდა.

ეს არის პირდაპირი მინიშნება იმაზე, რომ გარეგნული სილამაზე ვერ იქნება სრულყოფილი იქ, სადაც ქალი ეკონომიკურად ან სოციალურად შეზღუდულია. PSP-მ 8 მარტი გამოიყენა, როგორც პლატფორმა მანიფესტისთვის, სადაც „არა-ს თქმის უფლება“ უფრო ძვირფასი „პროდუქტია“, ვიდრე ნებისმიერი თავის მოვლის საშუალება.

 

GPC x holy motors – ქალები ვალამაზებთ ერთმანეთს

GPC-მ წელს ქალური მხარდაჭერის წინ წამოწევა გადაწყვიტა და ასაკიან, გამოცდილ ქალებზე ფოკუსირდა. PSP-ს მსგავსად, საუბარი აქაც სახის მოვლისა და კოსმეტიკის საშუალებებით იწყება, თუმცა შემდეგ პერსონაჟი გვეუბნება, რომ საუკუნოვანი გამოცდილების მიხედვით, სილამაზის საიდუმლო არა ბალზამები, არამედ ერთმანეთის მხარდაჭერა და ტკბილი სიტყვებია.

საინტერესოა, GPC 60+ სეგმენტზე კონცენტრირდება მომავალში და იმიტომ დაგვანახა ბებოები თუ მათზე ფოკუსი უბრალოდ ერთჯერადი კამპანიის ნაწილია.

ფაქტია, ფარმაცევტულმა კომპანიებმა წელს თავის მოვლის პროდუქტების ნაცვლად რეალური ღირებულებების წინ წამოწევა გადაწყვიტეს.

 

სიჯიუტე და მადლიერება – TBC, BOG

TBC x playmakers – მარტი ჯიუტი ქალების თვეა

თიბისიმ თავის ბრენდპლატფორმაში სიტყვა „ჯიუტი“ პირველად გასული წელს, დამოუკიდებლობის დღისადმი მიძღვნილ ვიდეორგოლში გამოიყენა, როცა გვითხრა: „ეს საქართველოა – ყველაზე ჯიუტი ადამიანების ქვეყანა“. ამას მოჰყვა ილია თოფურიას „მე ყოველთვის მოსაგებად მოვდივარ“, სადაც სიჯიუტე კვლავ მნიშვნელოვანი სიტყვა იყო. და რადგან მარტის კამპანიაც სწორედ სიჯიუტეზე ააგეს, ე. ი. ეს უბრალოდ სიტყვა კი არა, გრძელვადიანი სტრატეგიის ნაწილია, რომელიც ჯიუტად უდგას კონკურენციაში საქართველოს ბანკის „ჟინს“. ახალ ვიდეორგოლში კომპანიამ ქალების ბრძოლისუნარიანობას, მიზანდასახულობასა და ხასიათის სიმტკიცეს გაუსვა ხაზი.

ვიდეორგოლში პეტრე, რომელსაც აქონდროპლაზიის დიაგნოზი აქვს, დედის, მაკუნა გოჩიაშვილის შესახებ გვიყვება. სწორედ მისი და სხვა დედების დამსახურებაა, რომ საქართველოში აქონდროპლაზიის დიაგნოზის მქონე ბავშვებს დამოუკიდებლობისა და ინტეგრაციის მეტი შესაძლებლობა აქვთ. ასე რომ, აქ სიჯიუტე მხოლოდ ხასიათის თვისება არაა, ესაა გადამრჩენი ძალა, რომელსაც სისტემური ცვლილებების გამოწვევა და მდგომარეობის სასიკეთოდ შეცვლა შეუძლია. ვიდეოს ბოლოს კი მთავარი გზავნილია: „დედებს და ქალებს შეუძლებელიც შეუძლიათ, როცა რაღაცის სჯერათ, როცა რაღაცის ბოლომდე სწამთ.“

და რაც არანაკლებ მნიშვნელოვანია: მთელი ეს დედობის ძალისხმევა და სირთულე დანახულია არა როგორც მსხვერპლი, არა როგორც საკუთარი თავის დათმობა, არა როგორც დრამატიზმში გადასული აუცილებლობა, არამედ როგორც სიმსუბუქე, სილაღე, საკუთარი თავის შენარჩუნება და განვითარება, ცეკვა, გართობა, თავისუფლება. მადლობა თიბისის და playmakers-ს დედობის ამ პერსპექტივით ჩვენებისთვის.

 

BOG x supermarket agency – ყველა ბებია მსოფლიოში საუკეთესოა

საქართველოს ბანკმა 3 მარტს დააანონსა, რომ ამ თვეს მიუძღვნიდნენ „მშობლებს, ვინც ასწავლეს ჩვენს მშობლებს მშობლობა. ადამიანებს, რომლებიც ყველაზე მეტს გასცემენ და ყველაზე ცოტას ითხოვენ, ჩვენი ბავშვობის მთავარ გმირებს – ბებიებს“.

ვიდეო იწყება ერთ-ერთი ყველაზე ცნობილი ბებიის რეფერენსით ქართული ფილმიდან „იმერული ესკიზები“, სადაც პერსონაჟი ბებიას ეძახის. „ბებია, ბებიააა…“ როგორც ერთგვარი კულტურული კოდი, თავიდანვე ქმნის კონტექსტს და მოლოდინსაც, რომ წინ ძალიან თბილი, ემოციური თხრობა და კადრები იქნება. არანაირი მოწოდება, არც ჭკუის სწავლება, მხოლოდ ემოცია, ნოსტალგია და მადლიერება. საქართველოს ბანკმა დაგვანახა ქალი, რომელიც ყველაზე ჩუმი, და ამავე დროს, ყველაზე ძლიერი საყრდენია – როგორც უდარდელი ბავშვობის სიმბოლო.

 

დასკვნისათვის:

ამ ნაწილში გზავნილებს არ შევაჯამებ, არც იმას ვიკითხავ, რომელი მათგანი მოგეწონათ ყველაზე მეტად, მხოლოდ ერთ რამეზე შევჩერდები: 7 ბრენდის ვიდეორგოლზე ვისაუბრეთ, რომელთაგან სამზე supermaket-მა იმუშავა, ორზე – playmakers-მა.

 

რაც უნდა განსხვავებული იყოს ბრენდები, სააგენტოების ხმა, ჩვეულებრივ, უფრო ძლიერად ისმის და აქ ჩნდება მთავარი მარკეტინგული გამოწვევა – როგორ არ დაიკარგოს ბრენდის ინდივიდუალურობა სააგენტოს ხელწერაში.

 

ამ თემას მომავალში ჩავუღრმავდებით, თქვენ კი ეჭვი არ შეგეპაროთ, რომ Ad Black Sea 2026-ზე საუბრისას ამ ვიდეოების ნაწილს კვლავ დავუბრუნდებით.

 

 

ვიზუალებში გამოყენებული ფოტო მასალა ეკუთვნის დასახელებულ ბრენდებს და წარმოადგენს მათ ინტელექტუალურ საკუთრებას.