პირველი ლანჩი ლინკდინზე

რატომ არ იყენებენ ბრენდები LinkedIn-ს აქტიურად? მე კი საპირისპირო კითხვას დაგისვამთ: რომელი ბრენდი გახსენდებათ, რომელმაც ბოლო დროს LinkedIn-ზე მარკეტინგული სვლა განახორციელა? ალბათ, ბევრმა თქვენგანმაც ეს გაიფიქრეთ: ერთ-ერთი პირველი ნამდვილად პოკე ბარი იყო.

 

პოკე ბარი ქართულ ბაზარზე 2018 წლიდან არსებობს, თუმცა ზოგიერთმა ჩვენგანმა მისი არსებობის შესახებ სულ ახლახანს გაიგო. ბრენდი რისკს არ შეუშინდა –  „პირველი მერცხალობა“ საკუთარ თავზე აიღო და ცოტა ხნის წინ LinkedIn-ზე საკმაოდ ხმაურიანი კამპანიით გამოჩნდა - სხვადასხვა ინტერესების მქონე, ლინკდინზე აქტიურ 20 ადამიანს ბოული გაუგზავნა. ბუნებრივია, ჩვენს თვალშიც მოხვდა და გადავწყვიტეთ ბრენდის წარმომადგენელს დავკავშირებოდით.

 

მოდი, ერთად განვიხილოთ რამდენად მნიშვნელოვანია LinkedIn-ზე ბრენდების გამოჩენა და რამდენად „რისკიანი“ შეიძლება იყოს ასეთი გადაწყვეტილება?

 

მანამდე კი მოგიყვებით რომ პოკე საკუთარ თავს არ აღიქვამს მხოლოდ როგორც კვების ობიექტს:

 

„გვინდა ხელი შევუწყოთ ადამიანებს, რომ იკვებონ ჯანსაღად, განსაკუთრებით მათ, ვინც მუშაობს, დაკავებულია ან აქტიურ ცხოვრებაშია ჩართული.“

ამ იდეის გაგრძელებაა მათი სხვა ინიციატივებიც – ერთობლივი სირბილი შაბათობით, ყავა, მუსიკა, პატარა ქომუნითი აქტივობები. პოკე ცდილობს იყოს ადგილი, სადაც ადამიანები არა მხოლოდ ჭამენ, არამედ ურთიერთობენ და ენერგიასაც აღიდგენენ.

 

რატომ აირჩია პოკემ LinkedIn

როდესაც პოკეს გუნდმა პირველი ცნობადობის კამპანიის დაგეგმვა დაიწყო, თავიდანვე ერთი პრინციპი ჰქონდათ განსაზღვრული – მაქსიმალური ეფექტი მინიმალური რესურსით.

 

როგორც პოკეს წარმომადგენელი, მარიამ ჯიქური გვიამბობს:

 

„პრინციპული გადაწყვეტილება იყო, რომ კომპანიას არ უნდა დაეხარჯა დიდი რესურსი. უნდა მიგვეგნო სწორი აუდიტორიისთვის და გვესაუბრა ჩვენს ღირებულებებზე სწორ გარემოში.“

 

ამ „სწორ გარემოდ“ მათთვის LinkedIn მოიაზრებოდა:

 

„სულ ვფიქრობდი, რატომ არ ჩანან სხვა კომპანიები LinkedIn-ზე, როცა ნებისმიერი პატარა საკითხი შეიძლება ძალიან ბევრმა ადამიანმა გაიგოს. LinkedIn-ზე პოსტებს უფრო ხშირად კითხულობენ, განსხვავებით სხვა პლატფორმებისგან, სადაც კონტენტი უფრო გასართობია და შეიძლება ყურადღება არ მიაქციო.“

 

ეს არჩევანი შემთხვევითი არ ყოფილა. პოკეს გუნდისთვის LinkedIn არ არის მხოლოდ კარიერული პლატფორმა – ეს არის სივრცე, სადაც ბრენდის მხრიდან გადადგმული ნაბიჯები უფრო მარტივად იქცევს ყურადღებას.

 

აუდიტორიის შერჩევისას პოკესთვის გადამწყვეტი არ ყოფილა, რამდენი გამომწერი ჰყავდა ადამიანს:

 

„ჩვენთვის მთავარი იყო, რომ აქტიური ყოფილიყო LinkedIn-ზე. დაახლოებით 20–25 ადამიანს გავუგზავნეთ პროდუქტი” და, როგორც მარიამი ამბობს, უარი პრაქტიკულად არავის უთქვამს.

 

მთავარი პირობა ერთი იყო: აბსოლუტური გულწრფელობა.

 

„არავის პოსტში და კომენტარში არ ჩავრეულვართ. არ მიგვიცია შენიშვნები. ჩვენთვის მნიშვნელოვანი იყო გვენახა, ადამიანები როგორ შეაფასებდნენ პოკეს რეალურად — როგორც დადებითად, ისე უარყოფითად.“

 

ეს მიდგომა კამპანიას უფრო აახლოებს გამოცდილებაზე დაფუძნებულ მარკეტინგთან, ვიდრე კლასიკურ ინფლუენსერ მარკეტინგთან.

 

როგორ დაინახა პოკეს ნაბიჯი კამპანიის მონაწილემ

მარიამ ტურძილაძე (+10k linkedin followers) ერთ-ერთი მათ შორის, ვისაც პოკე ბარმა ბოულების გაგზავნა შესთავაზეა. როგორც მარიამი გვეუბნება, კამპანიამ სწორი არხის შერჩევით მოახერხა მიეღწია იმ ადამიანებამდე, რომლებიც მისი პოტენციური მომხმარებლები არიან.

 

როგორც მარიამი გვეუბნება, შეთავაზებაზე დათანხმებისთვის გადამწყვეტი აღმოჩნდა სწორედ კომპანიის არჩევანი - სამიზნე აუდიტორიაზე გასასვლელად ლინკდინი შეერჩიათ:

„პოკე ბარის შემთხვევა კარგი მაგალითია სხვა ბრენდებისთვისაც, რომ ლინკდინზე შესაძლებელია მარკეტინგული აქტივობების განხორციელება, თუკი თვლი, რომ შენი სამიზნე აუდიტორია აქაა. პოკე ბარი რომ მიხვდა ამას და გამოიყენა არსებული რესურსი, თანაც მინიმალური დანახარჯით, ძალიან დასაფასებელია. ჩემ გარდა ათობით ადამიანს გაუგზავნეს - ხალხს, ვისაც ვკითხულობ და პატივს ვცემ - რაც იმაზე მეტყველებს, რომ კომუნიკაცია უშუალოდ ლინკდინელებთანაც სწორად დაამყარეს“.

 

რეკომენდაცია

მარიამის აზრით, მსგავსი კამპანიები შესაძლოა კიდევ უფრო ეფექტური იყოს, თუ ბრენდი საკუთარ თავზე საუბარს უფრო ხანგრძლივ დროზე გაანაწილებს:

 

„სტრატეგიულად მგონია, რომ მინიმუმ სამი თვის განმავლობაში, ირიბად, პოსტებით და კომენტარებით შენზე ლაპარაკი უფრო კარგი გადაწყვეტაა.“

 

ეს არ ნიშნავს, რომ პოკეს ნაბიჯი მცდარი იყო – არამედ მიუთითებს განვითარებად შესაძლებლობაზე.

 

მარიამ ტურძილაძის გამოცდილება ადასტურებს, რომ:

 

• ბრენდმა სწორად ამოიცნო აუდიტორია;
• ადამიანებს რეალურად მისცა საკუთარი აზრის გამოთქმის უფლება;
  
  

და სწორედ ეს ქმნის იმ განსხვავებას, რის გამოც პოკეს LinkedIn კამპანია შეიძლება ჩაითვალოს ექსპერიმენტად, რომელმაც ბრენდი საუბრის ცენტრში მოაქცია.

ნეგატიური რეაქციაც პროცესის ნაწილია

მსგავს კამპანიებს, როცა ერთდროულად ბევრი ადამიანი საუბრობს ერთსა და იმავე პროდუქტზე, დადებითთან ერთად, თითქმის ყოველთვის მოჰყვება უარყოფითი რეაქციაც:

„ერთი ნეგატიური კომენტარი მახსოვს. თავიდან გულზე მომხვდა, მაგრამ მერე მივხვდი, რომ ეს ნორმალურია. აუდიტორია მაშინ არის ჯანსაღი, როცა მხოლოდ დადებითი რეაქცია არ მოყვება ყველაფერს.“ - მარიამ ჯიქური

უმეტესად ადამიანები პოზიტიურად იყვნენ განწყობილი ბრენდის მიმართ, განსაკუთრებით იმის გამო, რომ პოკემ სწორად მიაგნო სამიზნე აუდიტორიას.

თუმცა იყვნენ ადამიანები, რომლებიც:

• პოსტების რაოდენობით შეწუხდნენ;
  
• LinkedIn-ზე კვების ობიექტის გააქტიურება ეუცნაურათ;
• ზოგმა კი ბოულის ფასიც გააკრიტიკა.

მაგრამ მაშინ, როცა  ე.წ. ყველაზე მსყიდველუნარიანი ადამიანები LinkedIn-ს სქროლავენ და ლანჩის მომხმარებლების დიდი ნაწილი ამ პლატფორმით სარგებლობს, როგორ ფიქრობ – კვების ობიექტისთვის LinkedIn-ზე გააქტიურება სწორი მიგნებაა თუ არა?

 

დასკვნა

და ბოლოს, არ ვიცი ეს სტატია გახდება თუ არა იმის მოტივაცია, რომ სხვა ბრენდებიც გადმოვიდნენ LinkedIn-ზე, მაგრამ ძალიან მინდა მინიმუმ ერთ რამეში მაინც დაეხმაროს ბრენდებს: არ შეეშინდეთ ექსპერიმენტების – იმ რაღაცების გაკეთების, რაც სხვას ჯერ არ გაუკეთებია.

ჩვენ გვჯერა, რომ ზოგჯერ სწორედ ასეთი ნაბიჯები აჩენს ყველაზე დიდ კითხვას, ყველაზე დიდ დისკუსიას – და საბოლოოდ, ყველაზე დიდ პროგრესსაც ქმნის.

პოკეს LinkedIn კამპანია კი გვაჩვენებს, რომ:

•  ბრენდებს შეუძლიათ იფიქრონ Instagram-სა და TikTok-ის მიღმა;
• ლინკდინზე შესაძლებელია რამდენიმე დღის განმავლობაში კონკრეტული ბრენდი იყოს ერთ-ერთი მთავარი სალაპარაკო თემა, თუ კონტექსტი სწორადაა შერჩეული;
• ზოგჯერ სწორედ რისკიანი გადაწყვეტილებები ხდება ყველაზე შესამჩნევი და დასამახსოვრებელი.

ეს არ არის ისტორია ერთი ბოულის შესახებ. ეს არის ისტორია იმისა, როგორ შეიძლება ბრენდმა აალაპარაკოს ადამიანები – და არა უბრალოდ ლამაზი რეკლამა გაუშვას. ჩვენ გვჯერა რომ  პოკე ბარის ნაბიჯმა სასურველი აუდიტორიის სწორად დანახვის კარგი მაგალითი შექმნა.