სად ვართ, რას ვაკეთებთ სწორად და რას – არასწორად
ინფლუენსერ მარკეტინგი საქართველოში
წარმატებული ინფლუენსერ მარკეტინგი უკვე დიდი ხანია მხოლოდ გამომწერების რაოდენობაზე არაა დამოკიდებული. ინფლუენსერი, კონტენტ კრეატორი, KOL (Key Opinion Leader) – საერთაშორისო ბრენდებს აქვთ გარკვეული კრიტერიუმები, რის მიხედვითაც საზღვრავენ, ვისთან ითანამშრომლონ ამა თუ იმ პროდუქტისა თუ კამპანიის ფარგლებში, რათა სასურველი შედეგი დადგეს, მაგრამ...
რა ხდება საქართველოში, აქვთ თუ არა ინფლუენსერებს შემუშავებული ბრენდის სტრატეგია, როგორ თანამშრომლობენ ისინი ბრენდებთან, როგორ ქმნიან კონტენტს და რის მიხედვით ზომავენ შედეგს – დღევანდელ სტატიაში ვეცდებით ამ შეკითხვებს გავცეთ პასუხი და ზოგადად, მიმოვიხილოთ ქართული ინფლუენსერმარკეტინგული ეკოსისტემა.
ინფლუენსერ მარკეტინგი ბიზნესისთვის
ინფლუენსერ მარკეტინგი საერთაშორისო მასშტაბით სულ უფრო და უფრო პოპულარული და მოთხოვნადი ხდება – ბრენდები ზრდიან ბიუჯეტს, იწყებენ გრძელვადიან თანამშრომლობას და მაღალ ROI-საც იღებენ. აქვე ჩავხედოთ სტატისტიკას:
- 2024 წელს ინფლუენსერ მარკეტინგის ბაზარმა საერთაშორისო მასშტაბით 24 მლრდ დოლარი შეადგინა, 2025 წელს 32.6 მლრდ-მდე ზრდაა მოსალოდნელი, რაც წინა წელთან შედარებით 35%-ზე მეტი ზრდაა;
- მსოფლიო ბრენდებისა და მარკეტინგული სააგენტოების 52-75% ინფლუენსერ მარკეტინგისთვის ცალკე ბიუჯეტის გამოყოფას ემხრობა;
- ბრენდების 26% მარკეტინგული ბიუჯეტის 40%-ზე მეტს დებს მხოლოდ ინფლუენსერ მარკეტინგისთვის;
- ინდუსტრიების მიხედვით ინფლუენსერ მარკეტინგში ყველაზე მეტს დებს მოდის ინდუსტრია, რასაც მოჰყვება მოგზაურობისა და კვების ინდუსტრიები;
- აშშ-ში 2025 წელს ინფლუენსერებისთვის გამოყოფილი ბიუჯეტი ბევრად აღემატება მარკეტინგის ტრადიციული არხებისთვის გამოყოფილ ბიუჯეტს;
- ინფლუენსერ მარკეტინგზე დახარჯული თითოეული 1$‑ისთვის ბიზნესები საშუალოდ 5.8 $‑დან 6.5 $‑მდე იღებენ;
- Gen Z და Millennials-ის 53% ვარაუდობს, რომ პროდუქტების შერჩევის გადაწყვეტილებაზე დიდ გავლენას სწორედ ინფლუენსერები ახდენენ;
რა ხდება საქართველოში?
მარკეტინგის მიმართულებით რაოდენობრივი თუ თვისობრივი კვლევები ფართოდ ხელმისაწვდომი ჯერჯერობით არ არის, თუმცა აღსანიშნავია commschool-ის „საქართველოს ტრენდების რეპორტი“, რომლის 2025 წლის ანგარიშში ვკითხულობთ, რომ, შედეგების გათვალისწინებით, მარკეტერები კრეატორებთან თანამშრომლობას მეტად სერიოზულად აღიქვამენ და მას უფრო გრძელვადიან პერსპექტივაში ხედავენ, ვიდრე აქამდე:
„კვლევის მონაწილეთა დიდი ნაწილის თქმით, სხვადასხვა პლატფორმაზე მცირე ზომის, მაგრამ სანდო აუდიტორიის მქონე ინფლუენსერები, ხშირად უფრო ეფექტურ შედეგებს დებენ. მარკეტერებს ესმით, რომ კრეატორები საკუთარ აუდიტორიებში უფრო დიდი ნდობით სარგებლობენ, ვიდრე უშუალოდ ბრენდები. ასევე ამჩნევენ, რომ მომხმარებელი ღიზიანდება „ძალით ჩატენილ“ რეკლამაზე, ამიტომ შემოქმედებითი თავისუფლების დათმობა უფრო ხშირი პრაქტიკა გახდა,“ – აღნიშნულია ანგარიშში.
მიუხედავად იმისა, რომ ინფლუენსერ მარკეტინგი მზარდია, კომპანიების ნაწილს ურჩევნია კონტენტი თავად შექმნას, რისთვისაც კონტენტ კრეატორების რესურსს იყენებენ. კონტენტ კრეატორებს, რომლებსაც საკუთარი არხი საკმარისად განვითარებული არ აქვთ, ურჩევნიათ ერთ ან რამდენიმე კომპანიასთან ითანამშრომლონ. ამ შემთხვევაში პროდუქტს კონტენტი ყიდის და არა სახე, ადამიანის გავლენა, ე. წ. ინფლუენსი, მინიმალურ დონემდეა დაყვანილი. commschool-ის 2025 წლის ანგარიშში ეს მიმართულებაც გამოიკვეთა: „გამოკითხული კომპანიების მეოთხედი (25%) გარე რესურსებით (outsourcing) საერთოდ არ ქმნის კონტენტს. კომპანიების ნახევრის შემთხვევაში კი, შიდა რესურსებით შექმნილი კონტენტის წილი 81%-100%-ია,“ – ვკითხულობთ ანგარიშში.
ვინ როგორ ქმნის დღეს კონტენტს და ვის აქვს რეალური გავლენა?
როგორც საერთაშორისო, ისე ადგილობრივი მასშტაბით, ინფლუენსერ მარკეტინგის პოპულარობა, სხვადასხვა სახის კონტენტის შექმნა-გავრცელება პანდემიის დროს დაიწყო აქტიურად. ამ თემაზე უკვე ბევრი ხუმრობაა, მაგალითად: „ეს მე – მივდივარ კომპორაციულ სამსახურში, რადგან პანდემიის დროს ცეკვა დამეზარა.“ სასაცილოა და რეალობასთანაც ახლოსაა. მიუხედავად იმისა, რომ თავისი კონტენტი ყველას ცეკვით არ დაუწყია, კომფორტის ზონიდან გამოსვლა თითქმის ყველას მოუწია, სანამ ჯერ კრეატორი, შემდეგ კი ინფლუენსერი გახდებოდა.
ჩვენ რამდენიმე ინფლუენსერს ვესაუბრეთ და მათზე დაყრდნობით შეიძლება ვთქვათ, რომ, ჩვეულებრივ, პერსონალური ბრენდის სტრატეგია დიდ ინფლუენსერებსაც კი არ აქვთ შემუშავებული – იმათაც კი, ვისზეც გვიფიქრია, რომ ადამიანი-ბრენდია. შეიძლება ამას ღირებულებებისა და პრინციპების ერთგულება და გემოვნების სტაბილურობა განსაზღვრავდეს. როგორც ამბობენ, თავიდან ამაზე არ უფიქრიათ და ინტუიციურად მოქმედებდნენ, თანდათანობით კი მეტი რამ ისწავლეს, თუმცა დღეს, როდესაც დიდი კონკურენციაა, საკუთარი ნიშა და სტრატეგია ყველა პოტენციურ ინფლუენსერს სჭირდება.
როგორც ნუტრიციოლოგი რუსკა ღვამიჩავა (@rgnutritionist) აღნიშნავს, პერსონალური ბრენდის სტრატეგიის შესახებ ბლოგის დასაწყისში არ უფიქრია, თუმცა დროსთან ერთად გარკვეული იმიჯი ბუნებრივად შეიქმნა:
„ჩემი ვლოგი, ერთი მხრივ, აკადემიურია, მეორე მხრივ, მეგობრულიც, ყოველდღიური ცხოვრების დეტალების გაზიარებით, თუმცა თავიდან ეს ყველაფერი არ დამიგეგმავს და არ გამიწერია, უბრალოდ მივყვებოდი ჩემს კონტენტს. ახლა ბუნებრივად დალაგდა, რომ არის გარკვეული პროდუქტები, სიტყვებიც კი, რაზეც ჩემს გამომწერებს მე ვახსენდები, მაგალითად, ყავა ან ავოკადო.“
ფიტნესი, ვარჯიში, მარათონი... თუ ამ სიტყვებზე ჩერი გახსენდებათ, ე. ი. ნინო ჩერქეზიშვილის, იმავე ჩერის, ბრენდსტრატეგია სწორად დაიგეგმა და განხორციელდა. ჩერი არის კრეატორი და ინფლუენსერი, რომელმაც ბლოგის დაწყებიდან მალევე დაიწყო ციფრული მარკეტინგის გუნდის შემოკრება, რათა არცერთი შეტყობინება არ დარჩენილიყო უპასუხოდ და სოციალური მედიის მიმართულებით ბრენდი სწორად განვითარებულიყო.
ნინო ჩერქეზიშვილი (@cherrys_fitness):
„ვინც კი საქართველოში ფიტნესს ახსენებს, უნდა გაახსენდეს ჩერი – ეს იყო ჩემი მთავარი მიზანი. ამიტომ იყო ჩემი საფასო პოლიტიკა თავიდანვე ასეთი, ძალიან ხელმისაწვდომი, რათა მაქსიმალურად დიდ აუდიტორიაზე გავსულიყავი. სტრატეგიის ერთ-ერთი მთავარი ელემენტი იყო მყარი, ლოიალური ქომიუნითის შექმნა, რომელსაც პროექტთან ემოციური მიჯაჭვულობა ექნებოდა. ამ მიზნით, ჩემს მარათონში ვინც ერთვება, ყოველდღიურად მისდის სამოტივაციო წერილი, რათა არ შეჩერდეს.“
როგორც ნინო ამბობს, თავდაპირველი სტრატეგიის განსაზღვრაში თავისი გამოცდილებები დაეხმარა და თავიდანვე იცოდა, რას და რატომ აკეთებდა:
„2017 წლიდან დავიწყე ბლოგის წარმოება. სწორედ მაშინ ვასრულებდი ინგლისში პერსონალური მწვრთნელების აკადემიას, სადაც ამ პროფესიას როგორც ბიზნესს, ისე გასწავლიან. დისტანციური სერვისების შეთავაზებისთვის მჭირდებოდა ონლაინ სივრცე, საიდანაც ჩემს შესახებ გაიგებდნენ. ამისთვისაც მქონდა სტრატეგია – გადავწყვიტე ჩემი ცოდნის გაზიარება, ერთი მხრივ, სფეროს მიმართ ინტერესის გაზრდის მიზნით, მეორე მხრივ - საბაზისი ნუტრიციული ცოდნისა და მოძრაობის მნიშვნელობის პრომოციისთვის. ამიტომ დავიწყე ინფორმაციული პოსტების წერა, რათა ქართული საზოგადოებისთვის საბაზისო ნუტრიციოლოგიური ცოდნა გამეზიარებინა. მალევე დავიწყე პირველი მარათონი, სრულიად უფასო, სადაც 250 გოგონა შევკრიბე და ერთ თვეში ისეთი შედეგები დაიდო, რომ გამოქვეყნების შემდეგ საოცრად გაიზარდა გამომწერების რაოდენობა.“
როდის არის ინფლუენსერი მზად ბრენდთან თანამშრომლობის დასაწყებად?
დღეისათვის ბევრი გამომწერი გადამწყვეტ როლს არ ასრულებს ინფლუენსერის არჩევისას. მეტიც, მიკროინფლუენსერები ზოგჯერ გაცილებით უკეთეს შედეგებს დებენ და ბრენდებიც ხვდებიან, რომ კონტენტისა და აუდიტორიის ხარისხია მთავარი.
ელენიკო რუხაძე (@foxy_eleniko):
„როცა ბრენდებთან თანამშრომლობა დავიწყე, მაშინ კომპანიები მხოლოდ ციფრებს უყურებდნენ. K თუ არ გეწერა, ყურადღებასაც არ გაქცევდნენ, ეს ინსტაგრამის გამო, Tiktok-მა მიკრო ინფლუენსერებს ძალიან გაუმარტივა საქმე და საშუალება მისცა, 0 გამომწერითაც კი დიდ აუდიტორიაზე გასულიყვნენ. ბრენდებმაც გაიაზრეს, რომ ციფრებს დიდად მნიშვნელობა არ აქვს და მეტიც, მიკრო კრეატორებს უფრო კარგი ინგეიჯმენთი აქვთ ხოლმე. ასე რომ, თუ ამ სფეროში ხარ, ნებისმიერ დროს მზად უნდა იყო ბრენდთან თანამშრომლობისთვის.“
რუსკა ღვამიჩავა (@rgnutritionist) :
„წელიწადზე მეტის დაწყებული მქონდა ბლოგი, როცა ბრენდებთან თანამშრომლობა დავიწყე. ასევე, მაშინ დავფიქრდი პირველად, რომ მე თავადაც უნდა მიმემართა მათთვის და მახსოვს, რამდენიმე კომპანიას თავად გავუგზავნე შეთავაზება სატესტო თანამშრომლობის შესახებ. ზოგი მათგანისგან მივიღე უკუკავშირი, ზოგისგან – არა. ახლა როგორც ვაკვირდები, ბევრად უფრო გამარტივდა. მთავარია, შენი ნიშა გქონდეს, რამე მხრივ მაინც იყო გამორჩეული. ამ დროს მნიშვნელობა არ აქვს, 15 ათასი გამომწერი გყავს თუ 5 ათასი.“
ინფლუენსერებთან ინტერვიუებისა და საერთაშორისო გამოცდილების გაზიარების საფუძველზე შეიძლება დავასკვნათ, რომ ინფლუენსერი ბრენდთან თანამშრომლობის დასაწყებად მზადაა, როცა:
- აქვს თავისი იდენტობა და კონტენტის მიმართულება, გამოკვეთილი ნიშა (მოდა, ჯანმრთელობა, მოგზაურობა, ტექნოლოგია...), საკუთარი ტონი, სტილი და ხედვა. რაც მთავარია, ამ ყველაფერს იცავს, არის თანმიმდევრული და ხარისხზე ორიენტირებული;
- ჰყავს სტაბილური აუდიტორია, რომლის ჩართულობაც მაღალია. მხოლოდ გამომწერების რაოდენობა საკმარისი არ არის, გაცილებით მნიშვნელოვანია აუდიტორიის ჩართულობა – კომენტარები, გაზიარებები და სხვა;
- ბრენდთან აქვს საერთო ღირებულებები და დარწმუნებულია, რომ მათი აუდიტორიები ურთიერთდაპირისპირებული არ არიან. მაგალითად, ბავშვთა კვების ბრენდს არ ექნება სურვილი ისეთ ინფლუენსერთან ითანამშრომლოს, რომელსაც ხშირად აქვს ალკოჰოლთან დაკავშირებული თუ ეპატაჟური კონტენტი.
ინფლუენსერების წითელი ხაზები ბრენდებთან თანამშრომლობისას
ჩამოყალიბებული პერსონალური ბრენდი და აუდიტორიის ნდობა ინფლუენსერს დიდ პასუხისმგებლობას ანიჭებს. არაერთი მაგალითი ყოფილა როგორც ადგილობრივი, ისე საერთაშორისო მასშტაბით, როდესაც ინფლუენსერმა არასწორ ბრენდთან თანამშრომლობის გამო უამრავი გამომწერი დაკარგა. ამ დროს იმიჯის აღდგენა და ნდობის დაბრუნება ურთულესია. ახლა თუ გასახდომი ჩაი და სხვადასხვა ფინანსური პირამიდა გაგახსენდათ, მაშინ მათთან ასოცირებული ინფლუენსერებიც გაგახსენდებოდათ. ისევ ხართ მათი გამომწერი?
ინფლუენსერებს ვკითხეთ, რა არის ის წითელი ხაზები, რომლებსაც არასოდეს გადაკვეთენ.
ელენიკო რუხაძე (@foxy_eleniko):
„ბრენდი, რომელთან თანამშრომლობასაც გადავწყვეტ, ჩემს ინტერესებში უნდა შედიოდეს და ჩემს ნიშას არ უნდა სცდებოდეს. არ უნდა იყოს რუსული! ზუსტად ის მომსახურება უნდა გაუწიოს სხვას, რასაც მე გამიწევს. ყოველთვის უარს ვამბობ ისეთ ბრენდებზე, რომელთა პროდუქტმაც შეიძლება დააზიანოს ადამიანის როგორც მენტალური, ისე ფიზიკური ჯანმრთელობა, მაგალითად, გასახდომი ჩაი, ნიკოტინი, ვეიპი, ალკოჰოლი, გემბლინგი. ასევე ძალიან დიდ მნიშვნელობას ვანიჭებ კომუნიკაციას. თუ არ მიცნობს, როგორც კრეატორს, არ იცის, რა ტიპის აუდიტორია მიყურებს, ან მიზანი არ აქვს და უბრალოდ პროდუქტის გაყიდვითაა დაინტერესებული – იქ მთავრდება ჩემი მათდამი ინტერესი.“
რუსკა ღვამიჩავა (@rgnutritionist) :
„რადგან ჩემი ნიშა უშუალოდ ჯანმრთელობას უკავშირდება, დიდი სიფრთხილით ვირჩევ ბრენდებს, რომელთანაც თანამშრომლობას ვიწყებ, რადგან პასუხისმგებლობა ძალიან დიდია. პირველ რიგში, ჩემი და ბრენდის ღირებულებები უნდა ემთხვეოდეს ერთმანეთს. არაერთხელ მქონია გასახდომი აბებისა თუ ჩაის რეკლამის შემოთავაზება, რაც ჩემთვის პირდაპირი ნიშანია, რომ ბრენდი საერთოდ არ იცნობს ჩემს ბლოგს. გარდა ამისა, ზოგჯერ მეტისმეტად ერევიან კონტენტში. შეიძლება პირდაპირ მზა ტექსტი გამოგზავნონ და სურდეთ სიტყვასიტყვით გაიმეორო. ამ დროს ვცდილობ ავუხსნა, რომ ჩემს აუდიტორიას მე საუკეთესოდ ვიცნობ და საშუალება უნდა მქონდეს ჩემი სტილით ვთქვა მათი სათქმელი.“
ნინო ჩერქეზიშვილი (@cherrys_fitness):
„ძალიან ფრთხილად ვარჩევ ბრენდს, სანამ მასთან თანამშრომლობას გადავწყვეტ. უპირატესობას ვანიჭებ რამდენიმეთვიან თანამშრომლობას და არ ვთანხმდები ერთჯერადს. გარდა ამისა, მე თვითონაც დამიგროვდა გასაყიდი სერვისები, არც სხვა ინფლუენსერების გვერდებზე არ მომწონს ბევრი რეკლამა. ამიტომ ჩემი სტრატეგია ასეთია: რამდენიმე გრძელვადიანი თანამშრომლობა იმ ბრენდებთან, რომლებიც ჩემთვის მისაღებია და ჩემს ნიშასთან ახლოსაა. ეს არის ერთ-ერთი მიზეზი, რატომაც ჩემი ბლოგის მიმართ ნდობის ხარისხი საკმაოდ მაღალია როგორც გამომწერების, ისე ბრენდების მხრიდან.“
რა ეშლებათ ინფლუენსერებს?
დღეს საკმარისად ვერ იაზრებენ, რომ ინფლუენსერი უკვე ბრენდია და ნებისმიერი პოსტი ერთდროულად არის კომერციული კომუნიკაციაც და პერსონალური კონტენტიც. ამიტომ შეცდომები, რომლებსაც დიდი ინფლუენსერებიც კი უშვებენ ხოლმე, არა მხოლოდ ერთჯერადად აზიანებს იმიჯს, არამედ გრძელვადიან ნდობაზეც მოქმედებს. ეს შეცდომებია:
- ბრენდპერსონის და სტრატეგიის არარსებობა – ბევრ ინფლუენსერს ჯერ კიდევ არ აქვს ჩამოყალიბებული, ვინ არის ის, როგორც ბრენდი. არ აქვთ განსაზღვრული არც ნიშა, არც ძირითადი ღირებულებები, ტონი თუ კონტენტის მიმართულება. სტრატეგიის გარეშე მოქმედება კი ხშირად ნიშნავს, რომ ბრენდი ან აუდიტორია თავისით აირჩევს მათთვის რელევანტურ თვისებებს, რაც, საბოლოოდ, კონტროლს ართმევს თავად ინფლუენსერს და ხშირად იწვევს აუდიტორიის დაკარგვას ან ბრენდებთან შეუსაბამო კოლაბორაციებს;
- ნიშიდან გადახვევა – ინტერვიუების დროს არაერთხელ აღინიშნა, რომ ნიშას უნდა გაუფრთხილდე. მაგალითად, კონტენტი წიგნებზე აქვს აწყობილი და უცებ რომელიმე კოსმეტიკურ ბრენდს არეკლამებს – ვინც წიგნების გამო გამოიწერა, ინტერესს დაკარგავს და დაემშვიდობება;
- „Copy-paste“ რეკლამა – გასაგებია, რომ ეს ბრენდის დაკვეთაც შეიძლება იყოს, მაგრამ ღირს დათანხმება? თუკი ვირუსული კამპანიის ნაწილია, შეიძლება ღირდეს, მაგრამ ათობით ინფლუენსერი უცებ ზუსტად ერთი და იმავე ტექსტით რომ ჩნდება, რეკლამაც ყალბი გამოდის, რაც აუდიტორიის ნდობის ხარისხზე უარყოფითად მოქმედებს;
- ზედმეტად ბევრი რეკლამა – თავიდან ყველა კონტენტით იწყებს, მაგრამ შემოთავაზებების ზრდასთან ერთად ცდუნებაც იზრდება. ამ დროს განსაკუთრებით მნიშვნელოვანია, ინფლუენსერმა ნებისყოფა გამოიჩინოს და რეკლამები თვის ჭრილში ისე გადაანაწილოს, რომ რეკლამების გვერდად არ იქცეს, რადგან აუდიტორია ჭარბ რეკლამაზე მკვეთრად უარყოფითად რეაგირებს და აქაც ყველაზე მნიშვნელოვანი რამ დგება საფრთხის წინაშე – ნდობა;
- არასანდო და არასათანადო ბრენდებთან თანამშრომლობა – ერთჯერადი ანაზღაურების სანაცვლოდ არ ღირს ისეთ ბრენდებთან თანამშრომლობა, რომელთა სანდოობაც კითხვის ნიშნის ქვეშ დგას. საუკეთესო შემთხვევაში, აუცილებელია დეტალური ინფორმაციის მოძიება იმ ბრენდისა და მომსახურების შესახებ, რის რეკლამასაც ინფლუენსერი გეგმავს – ეს არის როგორც აუდიტორიის, ისე საკუთარი თავის პატივისცემა. და დიახ, ვიცი, ისევ გასახდომი ჩაი და ფინანსური პირამიდა გაგახსენდათ. ზუსტად ამას ვგულისხმობდი.
ცხადია, ინფლუენსერებისა და ბრენდების შეცდომებს შორის მიზეზშედეგობრივი კავშირები არსებობს. ადგილობრივი ინფლუენსერ მარკეტინგის გაუმჯობესებისთვის აუცილებელია ბრენდებსა და ინფლუენსერებს შორის სწორი კომუნიკაცია შედგეს, მიზნებსა და ღირებულებებზე კონცენტრირდნენ, კონკრეტულ სტრატეგიებს დაეყრდნონ და არა ემოციურ გზავნილებს. მომდევნო სტატიაში მოგიყვებით, რა ეშლებათ ბრენდებს.
დასკვნისათვის:
ინფლუენსერ მარკეტინგი საქართველოში თანდათანობით გადადის ზრდისა და სერიოზულად აღქმის ეტაპზე. გამომწერების რაოდენობა, რომელიც ერთ დროს მთავარ კრიტერიუმად გვესახებოდა, დღეს მხოლოდ ნაწილობრივ ასახავს რეალურ გავლენას. ნდობა, თანმიმდევრულობა, ღირებულებების ერთგულება, კონტენტის ხარისხი და აუდიტორიის ლოიალურობა – ეს არის ის, რაც განსაზღვრავს წარმატებას.
ჩვენ მიერ ჩატარებული მოკვლევა და ინტერვიუები გვაჩვენებს, რომ პროფესიული განვითარება ამ ინდუსტრიაშიც სწორი კითხვებით იწყება და არა მექანიკურად გამოყოფილი ბიუჯეტით. ინფლუენსერის არჩევისას ბრენდმა უნდა იცოდეს, რა სჭირდება – ხილვადობა, ლოიალობა თუ კონტენტი – და მისი შერჩევისას ზუსტად ამ კრიტერიუმებს უნდა დაეყრდნოს.
იგივე ვრცელდება კრეატორებზეც – ჩამოყალიბებული ბრენდპერსონა, გამოკვეთილი ნიშა, სტაბილურობა, ხარისხიანი კონტენტი და აუდიტორიისადმი პასუხისმგებლობა ქმნის ნდობას, რომელიც ყველაზე ძვირფასი რესურსია ციფრულ ეპოქაში.
დღეს ინფლუენსერი მხოლოდ რეკლამის მედიაარხი არ არის. ის თავად არის მიკრობრენდი, რომელსაც რეალური გავლენა აქვს აუდიტორიაზე და სწორედ ამიტომ მასზე ვრცელდება ყველა ის მოლოდინი და პასუხისმგებლობა, რაც ბრენდს გააჩნია.
გამოყენებული წყაროები:
დასამუშავებელი თემები სამომავლოდ:
- როგორ თანამშრომლობენ ბრენდები ინფლუენსერებთან – ინტერვიუები კომპანიების მარკეტინგული სამსახურების წარმომადგენლებთან
- როგორ ქმნის ინფლუენსერი ბიზნესს – ქართული ქეისები
- Kids & Family ინფლუენსერები – ბავშვები, მშობლები და მორალური საზღვრები