როგორ ვიგეგმებით 2026 წლისთვის
მარკეტერების ხმა – 2026
ერთ-ერთი მიზეზი (იქნებ ერთადერთიც), რის გამოც მარკეტერებს, შესაძლოა, ახალი წლის მოახლოება არ გვიყვარდეს, ესაა: მას ყოველთვის თან ახლავს ძველი წლის შეჯამება და ახლისთვის ინტენსიური მზადება. მარკეტინგული სტრატეგიის, აქტივობებისა და ბიუჯეტის დაგეგმვა შრომატევადი პროცესია – ფიზიკურადაც და მენტალურადაც. ამიტომ ეს პერიოდი ბევრისთვის დისკომფორტთან ასოცირდება.
გადავხედოთ წარსულს, გავაანალიზოთ მიღწევები და შეცდომები, გამოვიტანოთ დასკვნა და პასუხი გავცეთ კითხვებს, რომლებიც ყოველწლიურად უფრო რთული ხდება – რა არის ჩვენი მიზანი? სად გვინდა მივიდეთ? და რა გზით? იმ გარემოში, სადაც ხშირად ერთი თვის დაგეგმვაც კი რთულია, წლიური სტრატეგიის შექმნა სერიოზულ გამოწვევად იქცა.
არასტაბილური სოციალური, ეკონომიკური და პოლიტიკური ფონი, ტექნოლოგიური აჩქარება და მომხმარებლის ქცევის სწრაფი ცვლილება ქმნის რეალობას, სადაც სტრატეგიული გადაწყვეტილებები სულ უფრო ნაკლებად მიჰყვება გრძელვადიან პროგნოზებს და უფრო მეტად ადაპტაციის უნარზეა დამოკიდებული.
ამ კონტექსტის გათვალისწინებით, 2025 წლის ბოლოს მარკეტერებს ვკითხეთ, როგორ ემზადებოდნენ ახალი წლისთვის, რა მოლოდინები აქვთ ბიზნესის მიმართ, რაზე აკეთებენ ფსონს, ან რაზე არა და საერთოდ – როგორ ხედავდნენ მარკეტინგის როლს არსებულ არასტაბილურ გარემოში.
სტატიის მიზანია შევაჯამოთ, რა მოლოდინები გვაქვს 2026 წელს – არა მხოლოდ აქტივობების ჭრილში, არამედ სტრატეგიული გადაწყვეტილებების მხრივაც; და ვუპასუხოთ მთავარ კითხვას: როგორ იქცევა მარკეტინგი მაშინ, როდესაც ზრდის სურვილი და კრიზისის განცდა ერთდროულად არსებობს?
მეთოდოლოგია
ამ კითხვებზე პასუხის გასაცემად ინდუსტრიაში მოქმედი უმაღლესი და საშუალო რგოლის 14 მარკეტერი გამოვკითხეთ, მათი მოსაზრებები შევაჯამეთ და კვლევითი მიგნებების სახით გიზიარებთ.
კვლევა ეფუძნება თვისობრივი კვლევის მეთოდოლოგიას და მიზნად ისახავს რესპონდენტების ხედვების, გამოცდილებისა და აღქმული ტენდენციების ანალიზს.
ოპტიმიზმი კრიზისის ფონზე
2026 წელს მარკეტერების განწყობა, ერთი შეხედვით, ოპტიმისტურია – რესპონდენტების უმრავლესობა ბიზნესის გაუმჯობესებას ელოდება. მთავარ მიზეზად, რამაც შეიძლება ბრენდების მარკეტინგული სტრატეგის აღსრულება შეაფერხოს, გამოკითხულთა უმრავლესობა ქვეყნის ეკონომიკურ მდგომარეობასა და პოლიტიკურ არასტაბილურობას ასახელებს. აქ ვხედავთ საინტერესო პარადოქსს: გაუმჯობესების მოლოდინი და ოპტიმიზმი თანაარსებობს კრიზისის განცდასთან ერთად.
ამ კონტექსტში სიმბოლურია ისიც, რომ რესპონდენტების ნახევარი 2026 წელს წინა წელთან შედარებით გაზრდილი მარკეტინგული ბიუჯეტით ხვდება, რაც ნამდვილად გააზრებული ინვესტიციაა - ხედავდე რისკებს და ფსონს მაინც დებდე ბიუჯეტის გაზრდაზე.
ბრენდი, როგორც არასტაბილურობასთან გამკლავების ბერკეტი
ბრენდი – ამ სიტყვას მარკეტინგში ყველაზე ხშირად ვხმარობთ, ზოგჯერ სწორად, ხშირად – არასწორად. ყველაზე მარტივად რომ ავხსნათ, ბრენდი ის ასოციაციაა, რომელიც პირველად ჩნდება კომპანიის, პროდუქტისა თუ მომსახურების შესახებ. მაგალითად, მე ვიტყვი კონიაკს და თქვენ… რომელი ბრენდი გაგახსენდათ?
დღეს, როდესაც ბაზარი დიდია, ყოველდღიურად იბადება ერთმანეთის მსგავსი ბიზნესები თუ პროდუქტები, ბრენდი მხოლოდ შერჩეული იდენტობა აღარ არის. ის თანამედროვე ბიზნესის ერთ-ერთი ყველაზე კომპლექსური და სტრატეგიული რესურსია, რომელიც სწორად გამოყენების შემთხვევაში კონკურენტულ თუ არასტაბილურ გარემოშიც სწორ მიმართულებას მოგვცემს.
როდესაც მარკეტერებს ვკითხეთ, რა სტრატეგიით გეგმავენ არსებულ არასტაბილურობასთან გამკლავებას, გვითხრეს, რომ 2026 წელს მათი ყურადღება ბრენდის გაძლიერებაზე, სხვადასხვა სცენარის წინასწარ გათვლასა და სამომხმარებლო ბაზრის გაფართოებისკენ უფრო იქნება მიმართული, ვიდრე ფასების შემცირებასა თუ გაზრდაზე.
გულწრფელად გითხრათ, ეს პასუხი გამიხარდა, რადგან მსგავს სიტუაციებში კომპანიები ხშირად ფასებით თამაშს იწყებენ – მარჟის შემცირებას, ფასდაკლებებს, სწრაფ ტაქტიკურ ნაბიჯებს… თუმცა კვლევაში ჩართულ არცერთ რესპონდენტს ფასებით თამაში 2026 წლის სტრატეგიად არ დაუსახელებია. რა თქმა უნდა, რეალურ ბაზარზე ასეთი გადაწყვეტილებები მაინც მოსალოდნელია, მაგრამ კვლევის ჭრილში ეს მნიშვნელოვანი სიგნალია, რომელიც გვაჩვენებს, რომ ბრენდის როლი ნელ-ნელა იზრდება და სტრატეგიული მართვის საფეხურზე ადის.
მარკეტერის ახალი როლი
ჩვენი დაკვირვებით, წლიდან წლამდე მარკეტერის როლი აშკარად იზრდება და იცვლება – ის სულ უფრო მეტად უახლოვდება ბიზნეს სტრატეგს და ნაკლებად – ადამიანს, რომელიც მხოლოდ კამპანიებს მართავს. მისი პასუხისმგებლობა აღარ შემოიფარგლება მხოლოდ არხების შერჩევით, ბიუჯეტის გადანაწილებითა თუ KPI-ების შესრულებით.
ამ ყველაფრის გათვალისწინებით, 2026 წლისთვის მოლოდინი გვაქვს, რომ მარკეტერი აქტიურად ჩაერთვება გადაწყვეტილებებში, რომლებიც ბიზნესის განვითარებას განსაზღვრავს: როგორ გაუძლოს კომპანიამ ბაზრის მერყეობას, როგორ შეინარჩუნოს მომხმარებლის ნდობა და ზრდის პოტენციალი არასტაბილურ გარემოში. სწორედ ამიტომ, მარკეტინგი უფრო მეტად გახდება საერთო ბიზნეს სტრატეგიის ნაწილი და არა მხოლოდ მისი შესრულების ინსტრუმენტი.
ეს ცვლილება პასუხისმგებლობასთან ერთად გავლენასაც გაზრდის. მარკეტერის ხმა უფრო მკვეთრად გაისმება სტრატეგიულ განხილვებში, რადგან სწორედ ის დგას მომხმარებელსა და ბიზნესს შორის და ხედავს, როგორ იცვლება ორივე მხარე ერთდროულად.
ინდუსტრიის მთავარი შფოთვები: ფრაგმენტაცია და მოკლევადიანობა
თუ მარკეტერებს ვკითხავთ, რა აშფოთებთ ყველაზე მეტად, პასუხი ტექნოლოგიების სწრაფი განვითარება ან AI არ არის. მთავარი შფოთვა უკავშირდება მედიისა და აუდიტორიის მზარდ ფრაგმენტაციას, ინდუსტრიის შიგნით მრავალფეროვნების ნაკლებობას და მოკლევადიან შედეგებზე გადაჭარბებულ ფოკუსს.
ეს მიუთითებს სისტემურ პრობლემაზე: არხები მრავლდება, ყურადღება იფანტება, მაგრამ სტრატეგიული ფოკუსის შენარჩუნება სულ უფრო რთული ხდება. ხოლო შედეგის მყისიერად მოთხოვნა გრძელვადიანი მიზნების შემუშავებასა და განხორციელებას აფერხებს.
AI – გამაძლიერებელი და არა შემცვლელი
როგორც ზევით ვთქვი, ხელოვნური ინტელექტი მარკეტინგის ინდუსტრიისთვის შიშის მთავარ წყაროდ არ აღიქმება. პირიქით - მარკეტერები მას ხედავენ როგორც ინსტრუმენტს, რომელიც ამარტივებს და აჩქარებს ყოველდღიურ პროცესებს: დიდ ტექსტებთან მუშაობას, ქოფირაითინგს, კონკურენტული გარემოს შეფასებას და ანალიზს.
მარკეტერების უმრავლესობა არ ელოდება, რომ უახლოეს წლებში ხელოვნური ინტელექტი მათ სრულად ჩაანაცვლებს. სტრატეგიული აზროვნება, ინტუიცია და კონტექსტის სწორად წაკითხვა კვლავ ადამიანის პასუხისმგებლობად რჩება. ამ თვალსაზრისით, AI უფრო პარტნიორია, ვიდრე საფრთხე – ის აძლიერებს მარკეტერის შესაძლებლობებს, მაგრამ გადაწყვეტილებების ცენტრში მაინც ადამიანი დგას.
არხები, ნდობა და გავლენა
მედიაარხების არჩევანში აშკარად დომინირებს სოციალური მედია და influencer/creator marketing და ეს შემთხვევითი არ არის. დაბალი ნდობის გარემოში ბრენდები სულ უფრო ხშირად ეძებენ არა უბრალოდ არხებს, არამედ ადამიანებს, ვისაც აუდიტორიასთან უკვე აქვთ ურთიერთობა, ავტორიტეტი და გავლენა.
ნელ-ნელა იცვლება ნდობის წყაროებიც: ის გადადის პლატფორმებიდან ადამიანებზე, რეკლამიდან – პირად რეკომენდაციებზე. მომხმარებლისთვის მნიშვნელობა აღარ აქვს მხოლოდ იმას, სად ხედავს ბრენდს, არამედ მისთვის მნიშვნელოვანია ვისგან ესმის ბრენდის შესახებ. 2026 წელს ეს ტენდენცია კიდევ უფრო გამყარდება – ბრენდებისთვის სულ უფრო მნიშვნელოვანი გახდება არა მხოლოდ ხილვადობა, არამედ ის, ვინ და რა კონტექსტში წარმოადგენს მათ ხმას.
რომ შევაჯამოთ:
2026-ისთვის უიმედო მდგომარეობა არ გვაქვს, თუმცა ვერც იმას ვიტყვით, რომ მარკეტერებისთვის (ან ნებისმიერი სხვა პროფესიის მქონე ადამიანისთვის) მარტივი წელი იქნება. ეს იქნება წელი, სადაც ოპტიმიზმი და შფოთვა ერთად იარსებებს; სადაც ზრდის სურვილი მუდმივად შეეჯახება არასტაბილურ რეალობას; და სადაც სწრაფი გადაწყვეტილებები ხშირად მოერევა გრძელვადიან ხედვას.
მთავარი, რაც ამ სტატიაზე მუშაობისას ყველაზე ნათლად დავინახე, არის ის, რომ მარკეტინგის მიმართულებაში უფრო მეტ როლს და გავლენას იძენს ბრენდის სტრატეგიულად მართვის სისტემა. არაპროგნოზირებადი თუ კრიზისული გარემოს პირობებში ბრენდი ხდება საყრდენი, რომლის გაძლიერებაც კომპანიებს სტაბილურობის შენარჩუნებაში ეხმარებათ.
შეიძლება სწორედ ეს არის 2025 წლის გაკვეთილი:
როდესაც გარემო არასტაბილურია, მარკეტინგის ძალა არა ხმაურში, არამედ აზროვნებაშია;
არა სიჩქარეში, არამედ სწორ მიმართულებაში;
არა მხოლოდ შედეგებში, არამედ იმ ღირებულებებში, რომლებზეც ეს შედეგები დგას.
ასე რომ, მართალია, ზუსტად არავინ ვიცით, რა მოხდება 2026 წელს, მაგრამ, თუ კომპანიები ფოკუსს მარკეტინგის როლის გააზრებასა და ბრენდის გაძლიერებაზე შეინარჩუნებენ, მარკეტერების ოპტიმიზმი ნამდვილად გამართლდება.