მომავალი არ ჩერდება, მომავალი მოდის

„მომავალი არ ჩერდება, მომავალი მოდის“ – გვითხრა საქართველოს ბანკმა დამოუკიდებლობის დღისადმი მიძღვნილ კამპანიაში და ეს აღმოჩნდა ამ დღის ერთ-ერთი ყველაზე ძლიერი გზავნილი. ერთი იდეა, ორი რეჟისორი, 6 დღე გადაღებისთვის, ათობით ლოკაცია, ათობით მსახიობი, 100 ათასი ზარი 100 ათას ემიგრანტთან... supermarket-მა და საქართველოს ბანკმა 2026 წლის 26 მაისის კამპანიაში ისეთი მასშტაბი გვაჩვენეს, რომელიც სავსებით გასაგებს ხდის კამპანიის შედეგებს: მილიონობით ნახვა ყველა ციფრულ არხში, ათი ათასობით კომენტარი და გაზიარება, ყველა მიმართულებით დადებითი უკუკავშირი.

თუმცა ყველაზე საინტერესოა არა შედეგი, არამედ პროცესი – რა დგას ამ რიცხვების უკან, ამიტომ დღეს ბრენდთან და სააგენტოსთან ერთად შევიხედავთ შიდა სამზარეულოში და განახებთ, როგორ შეიქმნა კამპანია – იდეიდან საბოლოო შედეგამდე.

იდეა

საქართველოს ბანკს supermarket-ის გუნდთან მუშაობის დიდი გამოცდილება აქვს. სააგენტო სრულად იაზრებს ბრენდის იდენტობას და პლატფორმას, ბრენდი კი ენდობა სააგენტოს. ამ ურთიერთგაგებისა და ნდობის საფუძველზე მუშაობის პროცესი სტანდარტულად ბრიფის გაწერით არ იწყება. ამიტომ სააგენტოსთან მალევე შეჯერდნენ 2026 წლის ახალ კონცეფციაზე, supermarket-მა თემის რამდენიმე გაშლა შესთავაზა და საბოლოოდ ერთზე შეჯერდნენ.

წლევანდელი კამპანია არამხოლოდ ზუსტად მიჰყვება ბრენდის იდენტობას და ავსებს „არ გაჩერდე“-ს ხაზს, არამედ აგრძელებს გასული წლის კამპანიის იდეასაც. 2025 წელს საქართველოს ბანკმა იმავე სააგენტოსთან ერთად გვითხრა: შენ ხარ ყველაფერი რაც იყო, შენ ხარ ყველაფერი რაც იქნება. წლევანდელი კამპანია კი იწყება სიტყვებით: თავისუფლება ყოველდღე იბადება თავიდან და გვაჩვენებს, რომ ყოველი დღე ახალი შანსია; თუ დღეს რაღაც არ გამოგივა, ახლიდან სცადე. ამის გადმოსაცემად კი შეარჩიეს ადამიანები, რომლებსაც ვერავინ და ვერაფერი ვერ აჩერებს – მომავალი თაობა.

 

მარიამ ცანავა, საქართველოს ბანკის ბრენდ მარკეტინგის ხელმძღვანელი:

„წელს სააგენტო supermarket-მა რამდენიმე მიმართულება შემოგვთავაზა 26 მაისისთვის, მათ შორის, გვესაუბრა ახალ თაობასა და მომავალზე. ეს იდეა იმდენად ზუსტად მოერგო საქართველოს ბანკის ხასიათს და ამავდროულად, იმდენად შთამაგონებელი აღმოჩნდა, რომ მალევე დავამტკიცეთ. პროცესმა იმდენად შეუფერხებლად ჩაიარა, რომ ჩვენი მხრიდან კომენტარები ან ცვლილებების საჭიროება არც კი წარმოქმნილა, რადგან იდეამ მთელი გუნდი ერთიანად აგვანთო.“

 

ბრენდის დაკვეთა და სააგენტოს გადაწყვეტა

სააგენტოს მიმართ ბრენდის მთავარი დაკვეთა ისეთი ვიდეოს შექმნა იყო, რომელიც მაყურებელს ბოლომდე ჩაითრევდა. მოკლე ფორმატის ვიდეოების ეპოქაში რთულია ადამიანს 3-წუთიანი ვიდეო აყურებინო და კიდევ უფრო რთულია დიდი სათქმელი თუნდაც 3 წუთში მოყვე. Supermarket-მა 2 წუთში შეძლო. როგორ?

როგორც ზევით ვნახეთ, ბრენდის ერთ-ერთი დაკვეთა ასევე იყო განსხვავებული ფორმატი, ვიზუალი და ფორმები გამოეყენებინათ. ამ ორმა დაკვეთამ – დინამიკა + განსხვავებული ვიზუალი – სააგენტოსა და პროდაქშენს (industria) ორიგინალური გადაწყვეტებისკენ უბიძგა.

ეკა ყიფიანი, კრეატიული სააგენტო Supermarket-ის თანადამფუძნებელი და კრეატიული დირექტორი:

„ის ქვეყანა, რომელიც მომავალზე ორიენტირდება, მას პირობებს უქმნის, მხარს უჭერს და აძლიერებს – არის ქვეყანა რომელსაც უკეთესი მომავალი უწერია. ამიტომაც ჩვენი სურვილი იყო გადმოგვეცა მომავლის მუხტი – მისი შეუჩერებელი ენერგია, მისი ხალისი, სიცელქე, სილაღე, სილამაზე და სიძლიერე. სულ მალე ისინი იქნებიან ჩვენ ქვეყანაში მთავარ როლში და სწორედ ისინი მოიყვანენ ახალ ქართულ ეპოქას. გვინდოდა თვითონ ფორმას გამოეხატა ეს ყველაფერი, ეს მუხტი და ენერგია. ამიტომ ვიდეო უნდა ყოფილიყო ახალი, მოულოდნელი, ძალიან მრავალფეროვანი, ცვალებადი დინამიკის და მუდმივად მოძრავი. ფროდაქშენის მხრივ ეს არც ისე მარტივი, მაგრამ ძალიან საინტერესო ამოცანა იყო. საჭირო იყო ზუსტი დაგეგმვაც და თავისუფლების დატოვებაც.“

 

განხორციელება

რატომ ორი რეჟისორი?

გიორგი ტაბატაძე, კრეატიული სააგენტო Supermarket-ის თანადამფუძნებელი:

„ვიცოდით, რამდენად ძლიერი რეჟისორია ბორჩხა (დავით ბორჩხაძე). ვიცოდით ანანოც (ანანო დოდელია) – თავისი ძალიან საინტერესო ხედვით, ესთეტიკით და მგრძნობელობით. და დაგვაინტერესა, რას მოიტანდა მათი ტანდემი. მათთვისაც საინტერესო გამოდგა ეს ექსპერიმენტი. ორივეს აქვს მუხტის, ხასიათის, სინამდვილის და ესთეტიკის გადმოცემის საოცარი უნარი, ხშირად განსხვავებული გზებით. სწორედ ეს იყო საინტერესო. რაღაცებში მათი ხედვები ერთმანეთს დაემთხვა, რაღაცებში განსხვავდებოდა, რაღაც იდეები გაიცვალა, ერთმანეთს გადაედო, გადამუშავდა, შეიცვალა… საბოლოოდ მივიღეთ არა ორი ცალკე ხედვა, არამედ ერთი ახალი ხასიათი.“

ქასთი და ლოკაცია

ვიდეოს დინამიკურობას, რაც ბრენდის მთავარი დაკვეთა იყო, კადრების სწრაფი ცვლილებების გარდა, პერსონაჟებისა და ადგილების მრავალფეროვნება ქმნის. ერთი თვე დასჭირდა ყველა ლოკაციისაა და მონაწილეების შერჩევას, საბოლოოდ, გადაღებას 2 სრულყოფილი ჯგუფი გაუძღვა, თითოს გადასაღებად 3 დღე ჰქონდა. გადაღებები თბილისის გარდა მიმდინარეობდა ჯავახეთში, ყაზბეგსა და გორში.

არცერთი კადრი შემთხვევითი არ არის, ყოველ ადგილს და ყოველ მოქმედებას თავისი სიმბოლური დატვირთვა აქვს, მაგალითად: ხის ტოტზე გადაკიდებული „დავითიანი“, level vardzia მაინკრაფტის სტილში, ჩახეული მავთულბადე და სირბილი ცისარტყელას მიმართულებით, დედაენის ძეგლი, დიდგორის ველი… სიმბოლურია ციტატაც ანა კალანდაძის ლექსიდან: კითხვის – „სხვა საქართველო სად არი?“ – პასუხად კამპანია გვეუბნება: ის არის ახალ თაობაში, იმ ენერგიაში და მოძრაობაში, რომელიც თავისუფლებას აგრძელებს და მომავალს ქმნის.

ვიზუალური გადაწყვეტა

საინტერესოა ვიზუალური გადაწყვეტაც. იდეის მიხედვით, ბავშვები არ უნდა ყოფილიყვნენ მხოლოდ პერსონაჟები, მათ უნდა დაერღვიათ კადრი, ტექსტისთვის გაესწროთ, ფორმატიდან გასულიყვნენ, საზღვრები წაეშალათ. ერთ-ერთი სიმბოლური გადაწყვეტა იყო ვიდეოს ბოლოს ეფექტი, სადაც თითქოს ბავშვები ეკრანიდან რეალურ სივრცეში გადმოდიან. ეს ვიზუალური იდეა შემდგომ ფილიალების ფასადებზეც გაგრძელდა გადმოსული ასოების ფორმით.

AI-ის ინტეგრაცია

ვიდეო ვიზუალურად იმდენად ეფექტურია, რომ ლოგიკურად გაგვიჩნდა შეკითხვა ხელოვნური ინტელექტის ჩართულობის შესახებ, თუმცა, როგორც გიორგი ტაბატაძემ გვითხრა, AI საერთოდ არ გამოუყენებიათ. კონკრეტული ეფექტების მისაღწევად გრაფიკაა გამოყენებული, მაგალითად, ვარძიის კომპიუტერული თამაშის ანიმაცია გრაფიკული ნამუშევარია. ასევე მცირე გრაფიკული ჩარევაა ცხენის, დედაენის ძეგლის, მრგვალ ხედზე მორბენალი გოგოს და ვიდეოს ბოლოს ბავშვების „ეკრანიდან“ ხტომის კადრებში.

 

კამპანიის მეორე ნაწილი – მომავალი თაობის ზარი ემიგრანტებს

რომ გვეგონა კამპანია სრულად ვნახეთ, აღმოჩნდა, რომ საქართველოს ბანკს კიდევ უფრო მასშტაბური რამ ჰქონდა დაგეგმილი – 100 000 ზარი ქართველ ემიგრანტებს მსოფლიოს სხვადასხვა წერტილში, მილოცვა და მადლიერება მომავალი თაობისგან.

კამპანიის ამ ნაწილს არ ჰქონდა პრეკომუნიკაცია, პოსტკომუნიკაციაში გამოიტანეს მედია განთავსებაც და ინფლუენსერების ჩართულობაც. ზარებში გამოყენებულია მომავალი თაობის ხმები, რომლებიც ემიგრანტებს გულწრფელი და ემოციური გზავნილით მადლობას უხდიან იმ ძალისხმევისა და ღვაწლისთვის, რომელიც მათ საკუთარი ოჯახების, მომავალი თაობისა და ქვეყნის მომავლის შენებაში შეაქვთ, მიუხედავად იმისა, თუ სად ცხოვრობენ დღეს.

 

თამარ ნოზაძე, საქართველოს ბანკის ფიზიკური პირების მარკეტინგის გუნდის უფროსი:

„წლებია ემიგრანტები სტრატეგიულად მნიშვნელოვანი სეგმენტია ჩვენთვის და კონკრეტულად მათთვის კეთდება ბევრი აქტივობა, ჩავდივართ მსოფლიოს სხვადასხვა წერტილში და მუდმივად ვყვებით ემიგრანტების ამბებს. პარალელურად, სხვადასხვა საგანმანათლებლო და კულტურულ პროექტებს ვახორციელებთ. 26 მაისისთვის ყოველ წელს განსაკუთრებულად ვემზადებით, რადგან ეს დღე მათთვის განსაკუთრებით ემოციურია. ყოველ წელს ვცდილობთ სხვადასხვა გზით ვუჩვენოთ, რომ მათ ვხედავთ და მადლიერები ვართ.

როცა წლევანდელი კონცეფცია დამტკიცდა, დავიწყეთ ფიქრი, როგორ დაგვეკავშირებინა ერთმანეთთან მომავალი თაობა და ემიგრანტები. იმის გათვალისწინებით, რომ ამ ადამიანებს აქვთ სამშობლოს, ოჯახის, მეგობრების მუდმივი მონატრების შეგრძნება, გვინდოდა ისეთი რამე მოგვეფიქრებინა, რაც მათ მიმართ მადლიერების გამოხატვაში დაგვეხმარებოდა. ამიტომ ბავშვების ხმები ჩავწერეთ და დავრეკეთ ასი ათას ადამიანთან მსოფლიოს სხვადასხვა ქვეყანაში. კამპანიას დადებითი გამოხმაურება მოჰყვა, მთელი დღის განმავლობაში უამრავი ზარი და შეტყობინება მივიღეთ დადებითი უკუკავშირით.“

 

შეჯამებისთვის

თუკი აქამდე 26 მაისს ბრენდების უმეტესობა წარსულსა და ისტორიაზე გველაპარაკებოდა, საქართველოს ბანკის და supermarket-ის წლევანდელმა კამპანიამ დრო მთლიანად შეცვალა, ახალი თაობა გამოიყვანა მთავარ როლში, წარსული და ისტორია კი ფონად გამოიყენა.

„მომავალი არ ჩერდება, მომავალი მოდის“ აღმოჩნდა არა უბრალოდ სლოგანი, არამედ პრინციპი, რომელმაც განსაზღვრა ყველაფერი – ვიდეოს ფორმატი, ვიზუალური ენა, რეჟისორული გადაწყვეტა, გადაღების ადგილები და საბოლოოდ კამპანიის მეორე ნაწილიც. თუ ვიდეოში მომავალი ახალი თაობის სახით გამოჩნდა, კამპანიაში ემიგრანტების ჩართვამ ეს სათქმელი რეალურ ადამიანებამდე მიიტანა და მადლიერებასთან ერთად მათ კიდევ ერთხელ შეახსენა, რომ ქვეყნის მომავალი მხოლოდ გეოგრაფიულ საზღვრებში არ იქმნება.

კარგი იდეა საკმარისი არასოდესაა, მთავარი მისი განხორციელებაა. მოლოდინი მაქვს, რომ ეს კამპანია, თავისი ყველა ასპექტით, არამხოლოდ ემოციურ დონეზე დარჩება წარმატებული, არამედ კრეატიული ინდუსტრიის ფესტივალებზეც ბევრ წარმატებას მიაღწევს.