სპორტი, როგორც კულტურული გამოცდილება

თუ ცხოვრებაში ერთხელ მაინც ყოფილხარ რომელიმე სპორტულ მატჩზე, ალბათ დამეთანხმები - ეს ბევრად მეტია, ვიდრე უბრალოდ თამაშის ყურება.

 

მაგრამ მაინც, რა ხდის ამ მოვლენას ასეთ განსაკუთრებულს?

 

ეს არის გულშემატკივარი.

 

ემოცია.

 

გამარჯვების საერთო ჟინი.

 

სტადიონზე მნიშვნელობა აღარ აქვს, ვინ ვინ არის, რა შეხედულებები აქვს ან საიდან მოდის, ათასობით ადამიანს მხოლოდ ერთი რამ აერთიანებს: საკუთარი გუნდის სიყვარული.

 

ეს არის სივრცე, სადაც ერთმანეთისთვის სრულიად უცხო ადამიანები ერთიანდებიან ერთი საერთო მიზნისთვის - მხარი დაუჭირონ მინდორზე მორბენალ სპორტულ გმირებს.

 

მატჩის დღე უბრალოდ კალენდარში მონიშნული თარიღი არ არის.

 

ეს არის გამოცდილება.

 

ეს არის ემოცია.

 

ეს არის ის დღე, როცა დილას გაღვიძებისთანავე წუთებს ითვლი თამაშის დაწყებამდე.

 

სწორედ ამ გამოცდილების გულშემატკივრებამდე მოტანის მიზნით შეიქმნა კიდევ ერთი ქართული სპორტული ბრენდი - MATCHDAY, რომელიც სეტანტას მორიგი პროდუქტია. ეს არ არის მხოლოდ სპორტზე საუბარი. ეს არის მატჩის დღის კულტურის, მოლოდინის, ატმოსფეროსა და ემოციის ავთენტურად გადმოცემა და ქომაგამდე მიტანა.

 

ეს არის ორგანიზებული სპორტული მოგზაურობა, რომელიც აერთიანებს:

• მატჩის ბილეთს

• სასტუმროში განთავსებას

• გიდს/მეგზურს

• და თამაშის დღის სრულ ატმოსფეროში ჩაძირვას

MATCHDAY ქმნის შესაძლებლობას, გულშემატკივარმა არა უბრალოდ უყუროს მატჩს, არამედ იცხოვროს მატჩის დღით, იგრძნოს ქალაქის სპორტული პულსი, თამაშის წინ არსებული მოლოდინი და ის განსაკუთრებული ენერგია, რომელიც სტადიონზე იქმნება.

უფრო მეტი დეტალის გასაცნობად, minds&marketing-ის გუნდი გავესაუბრეთ MATCHDAY-ის მარკეტინგისა და ბრენდინგის მიმართულების თანაავტორებს, სალომე ყალიჩავას (Community Impact head at setanta sports) და ნათია ნოზაძეს (Brand lead at setanta sports).

ბრენდის ფორმირება: სტრატეგიიდან ვიზუალურ იდენტობამდე

ბრენდზე მუშაობა Setanta Sports-ის გუნდმა გასული ზაფხულიდან დაიწყო. მოთხოვნა არსებობდა, თუმცა თავად „matchday experience“-ის მნიშვნელობა და სიღრმე ფართო აუდიტორიას სრულად გაცნობიერებული არ ჰქონდა.

ნათია ნოზაძე, Brand Lead at Setanta Sports

“ეს ისეთი პროდუქტია ერთხელ რომ გამოცდი, ეჯაჭვები და გინდა თავიდან წახვიდე და ხელახლა გამოსცადო. საქართველო ევროპაზე რომ გავიდა, მაშინ ბევრმა ქართველებმა პირველად გაათვითცნობიერა რას ნიშნავს ევროპული matchday გამოცდილება.

 Matchday, ხომ სპორტის, კულტურისა და მოგზაურობის შერწყმით იქმნება.

თავგადასავალი მხოლოდ სტადიონზე თამაშის ყურებით არ სრულდება და ის მოიცავს ახალი ქალაქების აღმოჩენას, ადგილობრივი კულტურის შეგრძნებას და სხვა გულშემატკივრებთან ერთად ემოციების გაზიარებას. ჩვენი პროდუქტები ამ ეტაპზე მოიცავს მდიდარი ისტორიის მქონე საკლუბო ფეხბურთის ტურებს და ბილეთებს, ხოლო უახლოეს მომავალში შემოგთავაზებთ კიდევ უფრო მრავალფეროვან სპორტული ლიგების არჩევანს.’’

 

ბრენდის ჩამოყალიბება მარკეტინგული სტრატეგიით დაიწყო, როგორ უნდა აღქმულიყო Matchday როგორც ბრენდი და არა უბრალოდ სერვისი. ამის შემდეგ გუნდი ვიზუალური იდენტობის შექმნაზე გადავიდა, რომელზეც სანდრო ალექსიძემ (Sashishi) ბერლინიდან იმუშავა სეტანტას გუნდთან ერთად. ეს პროცესი განსაკუთრებით სასიამოვნო აღმოჩნდა, რადგან მხარეების ხედვები ბუნებრივად დაემთხვა ერთმანეთს. სწორედ სპორტის, კულტურისა და დიზაინის ერთნაირმა აღქმამ გააერთიანა გუნდი და თანამშრომლობას საერთო ენა მისცა.

 

კომუნიკაციის საწყის ეტაპად არჩეულია ჟურნალის (Magazine) ფორმატი, სადაც განსაკუთრებული ყურადღება ეთმობა სპორტის კულტურასა და მოდასთან სიახლოვეს. ვიზუალურ სტილს თავიდანვე დიდი მნიშვნელობა მიენიჭა, Matchday არ უნდა ყოფილიყო უბრალოდ მედია, რომელიც ‘’არეპოსტებს’’ ან თარგმნის უცხოურ კონტენტს.

 

“Matchday კომპლექსური პროდუქტია და მისი მომხმარებლამდე სწორად მიტანა გამოწვევა იყო. დიდი შრომა გაიწია ვებგვერდის შექმნაზეც, რომელზეც phase.design-თან ერთად ვიმუშავეთ. საბოლოო ჯამში დეკემბერში გავეშვით და ახლა “soft launch’’-ის პერიოდში ვართ. თავიდანვე ეს იყო გეგმა - დაგვეწყო სატესტო რეჟიმში, აგრესიული სტარტის გარეშე და დავკვირვებოდით ბაზარს და მომხმარებელს.’’

 

ბაზრის აღქმა და მთავარი ბარიერი

ბრენდის გაშვებამდე ჩატარდა როგორც ბაზრის, ისე ფასის კვლევა, რადგან პროდუქტი შედარებით მაღალი ფასის კატეგორიაში გადის. სპორტის მოყვარულებთან საუბრისას გამოიკვეთა ერთ-ერთი მთავარი ბარიერი - ბევრს ჰქონდა განცდა, რომ მსგავსი გამოცდილების ორგანიზება საკუთარი ძალებითაც შეეძლო. თუმცა Matchday მხოლოდ მეგზურობას არ სთავაზობს მომხმარებელს, ის აძლევს წვდომას სხვადასხვა უნიკალურ აქტივობაზე, რომლებიც მანამდე არ იყო ხელმისაწვდომი. სწორედ ამ აღქმის შეცვლა არის ბრენდის ერთ-ერთი მთავარი ამოცანა.

 

პროდუქტი როგორც კულტურა და არა მხოლოდ სერვისი

Matchday-ის მარკეტინგული გადაწყვეტა ტრადიციული პროდუქტის გაყიდვის მოდელს სცდება. სეტანტას გუნდი ამ პროდუქტს მედიისა და ჟურნალის ფორმატის ესთეტიკითა და ნარატივით წარმოაჩენს.

მსგავსი გამოცდილებები უცხოეთში, უკვე განვითარებული კულტურული ნაწილია, თუმცა საქართველოში ეს მიმართულება ჯერ კიდევ ფორმირების პროცესშია. სწორედ ამიტომ, ბრენდის ამოცანა მხოლოდ გაყიდვა არ არის. პირველ ეტაპზე მთავარი მიზანი ცნობიერების ამაღლებაა.

მიუხედავად იმისა, რომ პროექტი ჯერ სატესტო ეტაპზეა, გუნდისთვის ერთ-ერთი ყველაზე მნიშვნელოვანი სიგნალი მომხმარებელთა პირადი შეტყობინებებია. ბევრი მარკეტერი ინბოქსს სათანადოდ არ იყენებს, მაშინ როცა სწორედ იქ იკვეთება რეალური მიგნებები - როგორ იგებს მომხმარებელი პროდუქტს, რა აინტერესებს და რა კითხვები უჩნდება.

სალომე ყალიჩავა, Community Impact Head at Setanta Sports

“ჩვენი გულწრფელი მიზანია, რომ ჩვენთან ერთად გავზარდოთ და განვავითაროთ კულტურა, სადაც ადამიანები, ილაპარაკებენ სპორტზე, პოსტერებზე, მოდაზე, ყოველდღიურ სტილში დააინტეგრირებენ სპორტულ ფორმებს, ატარებენ სპორტულ აქსესუარებს და ამაყები იქნებიან მისი ტარებით.”

სამომავლო გეგმები და ბრენდის განვითარების პერსპექტივა

სპორტი და მოდა უკვე მჭიდროდ არის დაკავშირებული ერთმანეთთან გლობალურ დონეზე. უკვე ვიხილეთ სპორტული და მოდის ბრენდების არაერთი კოლაბორაცია. ამ ყველაფრის იდეაა, რომ სპორტული ფორმა და ატრიბუტიკა მხოლოდ სტადიონთან დაკავშირებული ელემენტი აღარ იყოს, არამედ ყოველდღიური სტილის ნაწილად და თვითგამოხატვის საშუალებად იქცეს. 

ამ პროცესში მნიშვნელოვან როლს თამაშობს მოგზაურობაც, როგორც თანამედროვე ‘’Lifestyle’’-ის ერთ-ერთი მთავარი კომპონენტი. ადამიანები გადაადგილდებიან ქალაქიდან ქალაქში, ქვეყნიდან ქვეყანაში და თან მიაქვთ თავიანთი სტილი, სპორტული იდენტობა და საყვარელი გუნდების სიმბოლიკა. 

სალომე ყალიჩავა, Community Impact Head at Setanta Sports

“Matchday-ის ყველაზე ბუნებრივი განვითარება სპორტული მოდა იქნება - ამ მიმართულებით ბევრი იდეა გვაქვს. გვინდა, რომ ბრენდი ადამიანების ყოველდღიურობის ორგანული ნაწილი იყოს. სადაც არის სპორტის გულშემატკივარი, იქ ვიქნებით ჩვენც ქუჩაში, გარდერობში, სპორტულ ღონისძიებაზე და ინსტაგრამის ფიდში.

ნათია ნოზაძე, Brand Lead at Setanta Sports

“ვინც უკვე ერთხელ არის ნამყოფი, ძალიან კარგი უკუკავშირები გვაქვს და კიდევ უფრო დავიჯერეთ ამ პროდუქტის. გვსურს, MATCHDAY იყოს ის ბრენდი, რომელიც გააერთიანებს სპორტის, კულტურისა და მოგზაურობის მოყვარულ ადამიანებს, გაუხსნის მათ გზას უნიკალური გამოცდილებების დაგროვებისკენ და მისცემს პლატფორმას მათი გაზიარებისთვის.

რკენას შემდეგ კიდევ ერთი წარმატებული ბრენდის მოლოდინში?

რკენას წარმატებული დებიუტის შემდეგ Matchday-იც მალევე დაიბადა, თუმცა ეს ორი სრულიად განსხვავებული პროდუქტია, განსხვავებული სტრატეგიით. რკენას მიზანი იყო გაშვებისთანავე მომენტალური ბუმი, ხოლო Matchday-ის სტრატეგია ნელი სვლა და დაკვირვებაა.

ისღა დაგვრჩენია დაველოდოთ, დავაკვირდეთ და უბრალოდ ვისიამოვნოთ იმით, რომ ქართულ ბაზარზე უკვე აქტიურად იბადება ახალი სპორტული ბრენდები. რაც მთავარია გააზრებული სტრატეგიით, მიზნითა და სამოქმედო გეგმით.

სპორტი, კულტურა, მოდა - უბრალოდ ტრენდული ახირება აღარ არის. ის ნელ-ნელა მკვიდრდება როგორც ცხოვრების სტილი, თვითგამოხატვის ფორმა და საზოგადოების გაერთიანების ერთ-ერთი ძლიერი მექანიზმი.

თუ ეს ტენდენცია გაგრძელდება, ქართული სპორტული ეკოსისტემა ეტაპობრივად გადავა ახალ ფაზაში - სადაც სპორტი იქნება არა მხოლოდ სანახაობა, არამედ გამოცდილება, იდენტობა და კულტურის ნაწილი.