PSP-ის დრამა, ბაკურიანის ჰალკი და სელფის „გადმორეკე“

„დღეს რამე ახალი გვჭირდება“ – არ ვიცი, იქნებ ზოგიერთი მარკეტინგის დეპარტამენტი ამ ფრაზით იწყებს შეხვედრას. ზუსტად არც ის ვიცი, რამდენად სრულყოფილად ქმნიან მარკეტერები გეგმას, მიჰყვებიან თუ არა სტრატეგიას, ეფუძნებიან თუ არა რაიმე კვლევას, ითვალისწინებენ თუ არა კულტურულ და ისტორიულ ფონს...

ყოველ შემთხვევაში თვიდან თვემდე ჩვენს თვალწინ არაერთი ახალი კამპანია ჩნდება. ზოგს ეტყობა, რომ ამაზე ბევრი იფიქრეს, ზოგს ეტყობა, რომ ამაზე ბევრი იშრომეს, ზოგიც ისეთ შთაბეჭდილებას ტოვებს, რომ ამაზე საერთოდ არ უფიქრიათ.

ამის მიხედვით, ზოგი კამპანია მოგვწონს, ზოგი არა, ზოგზე კი ფიქრსაც ვერ ვახერხებთ, ისე რჩება ყურადღების მიღმა.

ბევრი რომ არ გავაგრძელო, დღეს ივნისს ვაჯამებთ და იმ კამპანიებზე გიყვებით, რომლებმაც minds&marketing-ის ყურადღება მიიპყრო. თუკი თვლით, რომ რამე გამოგვრჩა, კომენტარებში დაგვიწერეთ.

 

კუპატა საქართველოს ბანკის ვიდეორგოლში

ბავშვთა დაცვის საერთაშორისო დღეს საქართველოს ბანკმა ბავშვების ერთგული თანამგზავრი, ბათუმელი ძაღლი, სახელად კუპატა, გაგვახსენა. ვიდეორგოლზე ანიმაციურმა სტუდია GARNAMATAC-მა იმუშავა. ბევრმა აღნიშნა, რომ ძალიან დახვეწილი ნამუშევარია და მნიშვნელოვანია, რომ კომპანია თანამედროვე ქართული ანიმაციური კულტურის განვითარებას ხელს უწყობს (და, მაგალითად, AI- გენერირებულ ვიდეოს არ დასჯერდა, როგორც ბოლო დროს ბევრმა გააკეთა).

ბავშვების ერთგული თანამგზავრი, რომელიც „ზებრაზე“ გადასვლაში ეხმარებოდა პატარებს, ხოლო მძღოლებს, რომლებიც არ გააჩერებდნენ, უყეფდა. კამპანიის სახელია „სიყვარულმა გაჩერება არ იცის“. ბრენდის მთავარი სლოგანია „არ გაჩერდე“ რომლის სხვადასხვა ვარიანტს კამპანიებში ვხვდებით, მათ შორის აქაც. ერთი ეგაა, რომ კუპატას მიზანი სწორედ მანქანების გაჩერების უზრუნველყოფა იყო და ამის შემდეგ სლოგანი ცოტა მოულოდნელად ჟღერს. სხვა მხრივ, ვიდეო მშვენიერია და კუპატას – ჩვენი პატივისცემა.

 

PSP, მიზონი და ინფლუენსერები კორეაში

ეს არის ივნისის ერთ-ერთი ყველაზე ცხელი თემა, რომელსაც სოციალურ ქსელში დიდი გამოხმაურება მოჰყვა. კორეაში ჩასულებიც არ იყვნენ, როცა უამრავი ვიდეო და პოსტი გავრცელდა, სადაც ძირითადად ეს შეკითხვები (და კრიტიკა) ისმოდა:

• რატომ წაიყვანეს მაინცდამაინც ეს ინფლუენსერები? ზოგი ბიუთი ბლოგერიც კი არ არის;
• საერთოდ რატომ წაიყვანეს ინფლუენსერები, ჯობდა თანამშრომლები წაეყვანათ.
• კონკურსი ჰქონდათ და მაინც ცნობილი ადამიანი წაიყვანეს, ჩაწყობილია.

თავად კომპანია არც პოსტით და არც კომენტარით არაფერს არ გამოხმაურებია, თუმცა მოგზაურობის რამდენიმე მონაწილემ ისაუბრა ამის შესახებ, ყველაზე დაწვრილებით – ნანუკა ჟორჟოლიანმა.

თუკი ეს დრამა გამოგრჩათ, სწრაფად გეტყვით რა მოხდა: მიზონს აქვს ახალი (და ინოვაციური) პროდუქტების პრეზენტაცია, სადაც იწვევს ინფლუენსერებს მთელი მსოფლიოდან. მიზონის ოფიციალური წარმომადგენელი საქართველოში არის პსპ, ხოლო ინფლუენსერები, რომლებიც პსპ-მ შეარჩია, ფაქტობრივად, კომპანიის ამბასადორები არიან. რაც შეეხება კონკურსს, თხუთმეტმა ადამიანმა მიიღო მონაწილეობა და ანანო თოთიაურმა გაიმარჯვა. ანუ არაფერი ისეთი, თუმცა...

ხალხიც მიხვდა, რომ მართლაც „არაფერი ისეთი“, ამიტომ სწრაფადვე შეიცვალა ძირითადი მიმართვები: უკვე აღარავინ ინტერესდებოდა, ვინ და რატომ წაიყვანეს, დადგა ახალი საკითხი: ფარმაცევტების ხელფასები: „თუ ამდენი ადამიანის წაყვანა შეუძლიათ კორეაში, ფარმაცევტებს ნორმალური ხელფასი გადაუხადონ.“ აი, აქ კი რთულია კონტრარგუმენტის მოფიქრება. თანაც ეს ამბავი სულ სხვა საბაბით დაიწყო.

მოკლედ, მოგზაურობა, რომელიც PR-კამპანიად იყო ჩაფიქრებული, კრიტიკის კამპანიად გადაიქცა და ალბათ კარგიცაა, PSP-მ სიჩუმე რომ არჩია პასუხის გაცემას.

 

ჰალკი (თუ დევი) და მიქაუტაძე ბაკურიანის კამპანიაში

ბაკურიანმა ახალი კამპანია გაუშვა სახელწოდებით „ზრუნვა წყალივით გვჭირდება“. სლოგანი, ერთი მხრივ, ეფუძნება ცნობილ ფრაზეოლოგიზმს „წყალივით მჭირდება“, მეორე მხრივ შედარებას – რომ ზრუნვა არამხოლოდ მნიშვნელოვანია, არამედ აუცილებელიც, მის გარეშე სრულყოფილად ვერ იცხოვრებ.

მთავარ ვიდეორგოლს არაერთგვაროვანი გამოხმაურება მოჰყვა. ზოგს მოეწონა, ზოგს – არა, ზოგმა კი უბრალოდ ვერ გაიგო. ვინ არის ის ლურჯი კაცი? – ზოგი ამბობდა ჰალკიაო და მეც ვიფიქრე, რომ ჰო, ალბათ ჰალკია, უბრალოდ ბაკურიანის ფერში, მაგრამ მერე თავად კომპანიის მარკეტინგის ხელმძღვანელის ახსნა წავიკითხე და როგორც აღმოჩნდა, „ის ლურჯი კაცი“ დევია, რომელიც ბრაზიან და გარიყულ ადამიანს განასახიერებს. ხოლო მას შემდეგ, რაც თანაგუნდელი წყალს მიაწვდის, ჩვეულებრივ გარდაიქმნება და აქედან მოდის სლოგანიც – „ზრუნვა წყალივით გვჭირდება“.

შეიძლება დევს ისევ „ლურჯი ჰალკი“ სჯობდა (ყოველ შემთხვევაში, მე რა გამოხმაურებებიც წავიკითხე, ხალხის ასოციაცია დევისკენ ნამდვილად ვერ წავიდა). ბოლოს და ბოლოს, ქართულ ზღაპრებში დევი სწორედ წყაროს ეპატრონება ხოლმე (გავიხსენოთ თუნდაც „ზღაპარი მზეჭაბუკისა“), მაგრამ რას ვიზამთ.

ვიდეორგოლის ბოლოს გიორგი მიქაუტაძე ჩნდება და თავისი საფირმო ფრაზის მოდიფიკაციურ ვარიანტს ამბობს: „მიყვარს, მიყვარს ბაკურიანი“.

ერთი შეხედვით, მიგნება კარგია:

• ზრუნვა, როგორც გუნდურობისკენ გადადგმული ნაბიჯი;
• გუნდურობა, როგორც ყველაზე მნიშვნელოვანი რამ ფეხბურთში;
• ფეხბურთი, როგორც სპორტის ყველაზე პოპულარული სახეობა.

თითქოს ყველაფერი რიგზეა, მაგრამ როგორ გადმოიცა ეს ამბავი? ეს ის შემთხვევაა, როცა შეკითხვა მეტი ჩნდება, ვიდრე ემოცია.

 

თვითირონია სელფის ახალ კამპანიაში

აშკარაა, სელფი ცდილობს დაგვავიწყოს, რომ ეს ის ძველი ბილაინია, თუმცა როგორც „წინაპრის ცოდვები“ გადადის რამდენიმე თაობაზე, ისე გადადის ბრენდის რეპუტაცია აწ უკვე განახლებულ ბრენდზე. შესაბამისად, ზოგჯერ რებრენდინგს იმაზე მეტი ძალისხმევა სჭირდება, ვიდრე ახალი ბრენდის შექმნას.

სელფის ახალი კამპანია „ვილაპარაკოთ გულწრფელად“ აჩვენებს, რომ შესაძლებელია კამპანია დაამყარო არა კონკურენტულ უპირატესობას, არამედ პირიქით – ზუსტად იმ სისუსტეს, რომლის გამოც პირველივე დღიდან გაკრიტიკებენ.

ჯერჯერობით სამი ვიდეორგოლი გავრცელდა და სამივეში გვეუბნებიან ერთს: სელფის აქვს საუკეთესო შეთავაზებები, გაიაქტიურე და ისარგებლე ყველგან... თითქმის ყველგან.

ყველამ ვიცით, რომ მაღალმთიან დასახლებულ პუნქტებში სელფი ცუდად იჭერს ან საერთოდ ვერ იჭერს. სხვა გეტყვის, რომ პრობლემა უნდა გამოასწორო, მაგრამ სელფიმ თქვა: ვიცი, რა არის ჩემი პრობლემა, მთაში შეიძლება არ იჭერდეს, მაგრამ აქვე ჩემი უპირატესობა – სხვა ნებისმიერ ადგილას საუკეთესო შეთავაზებებით ისარგებლებ.

ცალკე აღნიშვნის ღირსია მესამე ვიდეორგოლი, რომელიც ერთ-ერთი ყველაზე ცნობილი და პოპულარული რეკლამის, მაგთის „გადმორეკეს“ ინტერპრეტაციაა. „ეჰ, ვერ გადავრეკე“ – დანანებით ამბობს მწყემსი, ჩვენ ყველას კი ნოსტალგიას გვიღვიძებს. კონკურენტის უკვდავი რეკლამის ინტერპრეტაცია საკუთარ რეკლამაში – ყოჩაღ, სელფი.

ამ თემაზე მომავალში ვრცელ სტატიას გაგიზიარებთ, მანამდე კი მითხარით, თქვენი ყურადღება რამ მიიქცია ივნისში?

 

ვიზუალებში გამოყენებული ფოტო მასალა ეკუთვნის ბრენდს და წარმოადგენს მათ ინტელექტუალურ საკუთრებას.