პირველად კანის ლომებზე

რა გვითხრა კანმა?

პირველ რიგში, გვითხრა welcome! კარი გაგვიღო და კიდევ ერთხელ დაგვაჯერა ჩვენი მისიის სისწორეში: სივრცეს, რომელიც მარკეტინგის გარშემო ცოდნისა და გამოცდილების გაზიარებისთვის შევქმენით, აქვს რეალური მნიშვნელობა და გავლენა; და ამან ახალ ეტაპზე გადაგვიყვანა, რაც საერთაშორისო ჰორიზონტზე ყურებაა.

შემდეგ გვითხრა, რომ ვიოცნებოთ, ძლიერად და დიდზე ვიოცნებოთ, მაგრამ არ დაგავიწყდეს თავმდაბლობა, რადგან ამ გზაზე „ეგოს თამაში“ შორს ვერ წაგიყვანს.  

სანამ რეპორტს გაგიზიარებთ, დღევანდელ სტატიაში მოკლედ მოგიყვებით იმ მთავარი მიგნებების შესახებ, რომლებიც 2026 კანის ლომებიდან წამოვიღე.

 

გამოცდილება, როგორც ბრენდი

ადრე თუ ბრენდის ფუნდამენტის გაძლიერებაზე გვესაუბრებოდნენ, ახლა ყველა ერთხმად გეუბნება, რომ მთავარია გამოცდილების შექმნა და გაუმჯობესება ორივე მხარეს - როგორც ბრენდის, ისე მომხმარებლის.

ფაზა, როდესაც ბრენდი მომხმარებლის შეხების წერტილშია და რეალურ გამოცდილებას გადის, უნდა გამოვიყენოთ როგორც ბრენდის ცნობადობის თუ სწორი პოზიციონირების შესაქმნელად, ასევე მომხმარებელთან უფრო ახლო ემოციური კავშირის დასამყარებლად.  

დღეს აღარ გვაქვს ფუფუნება, ჯერ ბრენდზე ველაპარაკოთ და შემდეგ პროდუქტი გამოვაცდევინოთ. დღეს, აჩქარებულ სამყაროში, პროდუქტია ბრენდიც, დაპირებაც და ამ დაპირების შესრულებაც. აი, აქ უნდა ვივარგოთ.

დღეს მომხმარებელს მხოლოდ სმენა და ყურება აღარ აკმაყოფილებს, მისი თანამონაწილეობა სურს.

შესაბამისად, რა გამოცდილებას სთავაზობ, თავს როგორ აგრძნობინებ და დღის ბოლოს რა შემორჩება შენს ბრენდთან ინტერაქციით, ესაა მთავარი.

საბოლოოდ, შემოქმედებითობა იმისთვის უნდა გამოვიყენოთ, რომ ჩვენი მომხმარებლის და ზოგადად, ადამიანების პრობლემა მოვაგვაროთ. ოღონდ, მართლა მოვაგვაროთ. მხოლოდ კარგი კრეატივით და კარგად მოფიქრებული მესიჯით კი არა, რეალური პრობლემის გადაჭრით, ისე რომ მომხმარებელმა ყოველდღიურობაში იგრძნოს ცვლილება.

 

this is a human business

თუ აქამდე AI-ს გამოყენებაზე გველაპარაკებოდნენ, ახლა უფრო მეტად, მის არგამოყენებაზე გვესაუბრებიან:

•          შემოქმედებითობა ადამიანის საქმეა;
  
•          ნებისმიერი საქმე ადამიანით იწყება და მთავრდება (ე. წ. სენდვიჩის პრინციპია, შუაში შეგვიძლია AI-ს გამოყენება);
  
•          AI პარტნიორია, რომელთან ერთადაც უნდა ვიმუშაოთ, ოღონდ წამყვანი ჩვენ ვართ;
  
•          მარკეტერების ახალი გამოწვევაა, ბრენდმა ადამიანებში ემოცია აღძრას, ხელოვნური ინტელექტისთვის კი იდეალურად „წაკითხვადი“ გახდეს;
  
•          შესაბამისად, უფრო ფასდება ადამიანის ხელწერა, ხმა, გავლენა შემოქმედებითობაში.
  
  

არც ის არ უნდა დაგვავიწყდეს, რომ ბრენდები ადამიანებს ჰგვანან – არსენალის ფანი ერთ დღეს ჩელსის ფანი ვერ გახდება. ახალი ბრენდმენეჯერები თუ სააგენტოები ხშირად ცვლიან კამპანიებს მხოლოდ იმიტომ, რომ „საკუთარი კვალი დატოვონ“ ან თავად მობეზრდათ ძველი ვიზუალი, მაგრამ ამდენ ცვლილებაში მომხმარებელი ბრენდს უბრალოდ ვეღარ იცნობს. კამპანიას მინიმუმ 2-3 წელი სჭირდება შედეგის მოსატანად, ბრენდის კაპიტალის შენებას კი – 10 წელი.

დღეს კონტენტის შექმნა იმაზე მარტივია, ვიდრე ოდესმე – ბრენდებს მილიონი ხელსაწყო აქვთ ამისთვის, შედეგად, კონტენტი არის ხმამაღალი, სწრაფი, მრავალფეროვანი, მაგრამ მას აკლია აზრი, მნიშვნელობა და ღირებულება. თუ გვინდა, ჩვენი ბრენდის ხმა ისმოდეს, ჩვენ კი არ უნდა ვილაპარაკოთ სულ, ისეთი ღირებულება უნდა შევქმნათ, რომ სხვებმა თავად ილაპარაკონ ჩვენზე.

კულტურული მომენტი, როგორც ბრენდის ავთენტურობის საზომი

დღეს კულტურულ მომენტებს კომუნები და ფანდომები ქმნიან, ბუნებრივად, ავთენტურად. ბრენდები კი ცდილობენ მათთან ემოციური კავშირის  გასამყარებლად ამ მომენტების მონაწილე გახდნენ. რაც ცუდი არ არის, კარგია. უბრალოდ, ყველა ვერ შეძლებს გახდეს იმის ნაწილი, რისიც ბუნებრივად არ არის. რადგან, რეალურად, ვისი გულის მოგებაც გვინდა, ისინი ძალიან კარგად ხვდებიან, ვინ ბუნებრივადაა ამ მომენტის ნაწილი და ვინ უბრალოდ „ცდილობს“, შესაბამისად ჩნდება კითხვა: მართლა ვერ ვიაზრებთ ამ ხელოვნურობას თუ უბრალოდ თავს ვიტყუებთ? მარტივად შეიძლება რეკლამით „იყიდო“ მომხმარებლის ყურადღება, მაგრამ მის სიყვარულს ვერ იყიდი.

ამდენად, თუკი აქამდე მომხმარებელი უბრალოდ უსმენდა ბრენდის ისტორიებს, ახლა თანამონაწილეობის დრო დგება. მომავალი ეკუთვნის არა უბრალოდ თხრობას, არამედ Story-doing-ს, სადაც მომხმარებელი ბრენდის გარშემო ჩამოყალიბებული ქომუნითის ნაწილი ხდება და თავად ქმნის მის იდენტობას.

ეს ყველაფერი ერთი დიდი მოგზაურობაა

რომელშიც აუცილებელია სრულყოფილად იცოდე საფუძვლები იმ საქმისა, რასაც აკეთებ, განსაკუთრებით დღეს, როცა ყველა ვიყენებთ ხელოვნურ ინტელექტს; და შესაძლოა, ერთ დღეს, უბრალოდ გავიღვიძოთ და ყველას ინტელექტუალური შესაძლებლობები ერთმანეთს ჰგავდეს - იყოს ზედაპირული და ხშირ შემთხვევაში – საბაზისო. ამიტომ, ფუნდამენტის გამყარება, ანალიზი, ანალიტიკა და ყველაფრის გაზომვაა საჭირო.

ამავდროულად, არ დაგვავიწყდეს, ამ მოგზაურობაში შიში და კრიტიკა ჩვენი მეგზურია, რომელსაც გამბედაობა უნდა ამოვუყენოთ გვერდით და წინ ვიაროთ! დრო გავა და უკან რომ მოვიხედებით, ვიფიქრებთ: „ახლა რა შორს ვიქნებოდი, მაშინ რომ დამეწყო!“ ამიტომ საუკეთესო დრო ამ მოგზაურობის დასაწყებად სწორედ ახლაა.

 

რა გვაგრძნობინეს ბრენდებმა?

როგორც გითხარით, ყველა და ყველაფერი გამოცდილების შექმნაზეა გადასული. არანაირი პრეზენტაცია, არანაირი წარმომადგენელი, არანაირი საუბარი ბრენდის გარშემო, მხოლოდ გამოცდა და სიამოვნება – ეს იყო ყველა ბრენდის აქტივაციის ზონის მისია, სადაც შესვლა მოვახერხე: გწყურია? – გაგრილდები, მოგშივდა? - აუცილებლად რამე გემრიელს შემოგთავაზებენ: ხემსი, ნაყინი…

აქ პროდუქტების ინტერაქციაც გამოცდილების ნაწილია. ბიზნესს ააგებდი amazon AWS-სთან ერთად, X-box-ს ითამაშებდი, amazon book-ს მოუსმენდი... და რაც მთავარია, ყველა ამ აქტივობით შენს პირად მონაცემებს აგროვებდნენ, რომელთაც მერე ალბათ კარგად დაამუშავებენ და სწორად გამოიყენებენ.

მოკლედ რომ ვთქვა, დასაჩუქრება, სიხარული, სიამოვნება, გართობა, ურთიერთობა – ეს იყო ყველა ბრენდის აქტივაციის ზონის გამოცდილება. ოღონდ ისე, რომ ვერასდროს მიხვდებოდი, ვინ ამაზონში მუშაობს, ვინ – მეტაში, ან ვინ – ლინკდინში.. ყველა თანაბარი, ყელა თანასწორი.

აქ დავფიქრდი, ეს როგორ გვაკლია საქართველოში. რატომღაც, მარტივად გამოვირჩევით, ვინ უფროსი ვართ, ვინ უმცროსი...

მომავალი წლისთვის შემოვინახე კანვა და სპოტიფაი, რომლებზეც წელს ვერ მოვხვდი.

 

და ბოლოს, რამ გაიმარჯვა კანის ლომებზე?

იდეაზე მეტად, რეალურმა გავლენამ გაიმარჯვა. უბრალოდ სწორად უნდა გვესმოდეს, რას ნიშნავს რეალური გავლენა - იმას, რამაც რეალური შედეგი დადო, ვინმე ან რამე შეცვალა; და ამ იდეამ, რეზონანსთან ერთად, რეალური როლი შეასრულა სამყაროს ან ადამიანების ყოველდღიურობის უკეთესობისკენ შეცვლაში, გარდაქმნაში, გაუმჯობესებაში.

გაიმარჯვა საქართველომ, როცა კანის ლომების ახალგაზრდული კონკურსის ფილმის კატეგორიაში გამარჯვებულებად გიორგი აბულაძე და ლუკა მოსიაშვილი დაასახელეს. მათ ნამუშევრისთვის ოქროს ლომი აიღეს და კიდევ ერთხელ ვულოცავ.

დიდი მადლობა თქვენ, ვინც გამოგვყევით ამ მოგზაურობაში და ჩვენთან ერთად იარეთ.

და დიდი მადლობა ჩვენს პარტნიორებს dressup.ge, Imedi L;  PSP და Roamingo! თქვენს გარეშე ეს ყველაფერი ამ ხარისხით ვერ შესრულდებოდა.

 

შევხვდებით მომავალ კანის ლომების ფესტივალზე!