ბარსელონას გავლენა ქართულ სპორტულ ბაზარზე
მეტი ვიდრე მაღაზია
ალბათ ცოტას თუ წარმოედგინა, რომ გლობალური სპორტული ბრენდი, 400-მილიონიანი გულშემატკივრის არმიით, პირველ საერთაშორისო ფანშოფს სწორედ საქართველოში, კერძოდ კი - თბილისში გახსნიდა.
და მაინც, 2025 წლის მარტში, FC Barcelona-მ თბილისის არჩევით ისტორიაში ახალი გვერდი დაწერა. ეს ნაბიჯი მხოლოდ გლობალური ბრენდის ლოკალიზაციის სტრატეგიის ნაწილი არ არის - ის მძლავრი სიგნალია ქართული ბაზრის მზარდი პოტენციალის შესახებ, რომელიც სულ უფრო მეტად იზიდავს საერთაშორისო მოთამაშეებს.
ჩვენ დაგვაინტერესა:
– რატომ აირჩია ბარსელონამ თბილისი;– როგორია ამ გადაწყვეტილების სტრატეგიული და ემოციური მნიშვნელობა;
– რას გვიყვება ეს ქართული ბაზრის შესახებ;
– და როგორ შეუძლია ლოკალურ ინიციატივას, გააღრმავოს გლობალურ ბრენდებთან კავშირი.
უფრო სიღრმისეული დეტალების გასაცნობად minds&marketing -ის გუნდი ამ ინიციატივის ავტორს და დამფუძნებელს, დავით ზაქარიაძეს გაესაუბრა. სწორედ ის და მისი გუნდი იყო ამ პროექტის სულისჩამდგმელი და მათი შრომითა და ინვესტიციებით შეუძლია ბარსელონას გულშემატკივარს, რომ დღეს რუსთაველის გამზირზე ფანშოპის ოფიციალურ მაღაზიაში შევიდეს და კატალონიური კლუბის კულტურას ეზიაროს.
რატომ აირჩია ბარსელონამ თბილისი
იდეა 2022 წელს გაჩნდა, მანამდე ბარსელონას არაერთხელ უცდია ესპანეთის ფარგლებს გარეთ მაღაზიის გახსნას, მაგრამ რაოდენ გასაკვირიც არ უნდა ყოფილიყო, არ ქონდათ გამოცდილება, არ იცოდნენ როგორ მოეყვანათ ეს ყველაფერი სისრულეში, როგორ დაეწყოთ საერთაშორისო ბაზარზე გასვლა.
სწორედ აქ გამოჩნდა ზაქარიაძე და მისი გუნდი, რომელმაც დეტალურად გაწერილი სტრატეგია წარუდგინეს, რა, როდის და როგორ გაკეთდებოდა, რომ ეს პროექტი წარმატებულად განხორციელებულიყო, წარმომადგენლები თბილისში ჩამოიყვანეს, და მალევე მოიხიბლნენ ჩვენი ქვეყნით, კულტურით და ფეხბურთისადმი სიყვარულით.
თბილისი დაინახეს, როგორც რეგიონალური ‘’hotspot’’ ანუ ცხელი წერტილი, რომელიც მოიზიდავდა, როგორც ადგილობრივ გულშემატკივარს, ისე ტურისტებს კავკასიის რეგიონის ქვეყნებიდან და არა მხოლოდ.
ბარსელონას ბორდმა დაინახა დეტალური გეგმა და სტრატეგია, ყველა ის კომპონენტი, რაც მათ ამ ნაბიჯის გადასადგმელად აკლდათ. ალბათ იფიქრეს, რატომაც არა? ასე დაიწყო ყველაფერი.
როგორია ამ გადაწყვეტილების სტრატეგიული და ემოციური მნიშვნელობა
მრავალწლიანი შრომის, ინვესტიციებისა და მოლაპარაკებების შემდეგ, 2025 წლის მარტში, რუსთაველის გამზირზე კატალონიური ჰიმნი გაისმა და ბარსელონას ოფიციალური მაღაზიაც გაიხსნა.
ამ მოვლენას დიდი გამოხმაურება მოყვა, როგორც ლოკალურ, ისე ესპანურ და ევროპულ მედიაში. დაიდო სტატია ერთ-ერთ უმსხვილეს სპორტულ გამოცემა ‘’ESPN’’-ზე, რომელსაც 26 მილიონამდე ინტერაქცია მოყვა. აქტიურად ანთავსებდნენ კონტენტს ესპანელი იუთუბერებიც - პირველი ოფიციალური მაღაზია ბარსელონას ფარგლებს გარეთ, და სად? - თბილისში. კი, ალბათ ვერავინ იფიქრებდა ამას.
ამ გადაწყვეტილების ემოციურ მნიშვნელობაზე მოდი ციფრებში ვისაუბროთ. ახალი ამბის გაგების შემდეგ, ბუნებრივია უმრავლესობა დაინტერესდა ფასით, რაც სოციალურ მედიაში აქტიური განხილვის საგანი გახდა: ‘’500 ლარი 1 მაისურში?’’, ‘’ძალიან ძვირია’’, ‘’რატომ უნდა გადავიხადო ამდენი?’’ და ა.შ. მაგრამ, როგორც დავით ზაქარიაძემ აღნიშნა, მათი საფასო სტრატეგია თავიდანვე ემყარებოდა მიზანს, რომ ყოფილიყო მაქსიმალურად მიახლოებული რეალურ ფასებთან, რაც ესპანეთის მაღაზიებშია, და მართლაც თუ შევადარებთ, ფასები თითქმის იდენტურია.
ემოციურ მნიშვნელობას, რომ დავუბრუნდეთ, ზაქარიაძის განცხადებით ის ფინანსური გეგმა, რომელიც ბარსელონამ მათ გუნდს დაუსახა წლის ბოლომდე, მათ 45 დღეში მოახდინეს ამ თანხის რეალიზება. ალბათ ამით ყველაფერი გასაგებია, ეს მეტია ვიდრე მაღაზია, ეს ადგილია, სადაც გულშემატკივარი საყვარელი გუნდის კულტურას ეზიარება. აღსანიშნავია, ის ფაქტიც, რომ მყიდველების 67% არის ქართველი, დანარჩენი წილი კი ტურისტებზე მოდის.
რაც შეეხება სტრატეგიულ მნიშვნელობას, როგორც ზემოთ ავღნიშნე, ბარსელონას არ ჰქონდა გამოცდილება უცხო ბაზარზე შესვლის. რატომ საქართველო? ალბათ იმიტომ, რომ ბაზარი ბევრად მარტივად ასათვისებელია, ვიდრე შეხვიდე საფრანგეთის ან თუნდაც სხვა რომელიმე დიდი ევროპული ქვეყნის ბაზარზე, სადაც კონკურენციაც დიდია და ბევრად კომპლექსური საფეხურებია გასავლელი. როგორც დავითმა მოგვიყვა, აქ ჩამოსულ ესპანელ სტუმრებს დაანახეს ქვეყნის პოტენციალი, სპორტული საბაზრო ეკოსისტემის დადებითი მხარეები, აჩვენეს ამ პროექტის აქ განხორციელების უფრო მეტი პლიუსი, ვიდრე მინუსი, წარუდგინეს ზუსტად გაწერილი 6 თვიანი სტრატეგია, ისეთი ტექნიკური დეტალებით, როგორიცაა ლოჯისტიკა, კომერცია, რეპორტინგი და ა.შ, რაშიც ბარსელონას არანაირი გამოცდილება არ ჰქონდა. ამით მისმა გუნდმა დიდი წვლილი შეიტანა საქართველოს მარკეტინგის განვითარებაშიც, რადგან მოდი ვაღიაროთ, რომ ეს პატარა ამბავი ნამდვილად არ არის ქართული სპორტული ბაზრისთვის.
როგორ მართავენ ადგილობრივი მაღაზიის მარკეტინგულ კომუნიკაციას
ბარსელონა არ არის მხოლოდ სპორტული გუნდი, ეს არის გლობალური ბრენდი, 120 გვერდიანი საიმიჯო ხელშეკრულებით, დიახ, არ მოგესმათ. აღსანიშნავია, რომ ბარსელონას 17 მაღაზიიდან, მხოლოდ ქართულ ფანშოპს აქვს თავისი ცალკე ინსტაგრამ გვერდი.
ყველა მარკეტინგული კამპანია და კონტენტი, რომელიც გვერდზე თავსდება, მანამდე თანხმდება ბარსელონას წარმომადგენლობასთან. წინასწარ დგება კონტენტ გეგმა, ესპანური მხრისგან დასტურის შემდეგ კი იწყება განხორციელება. ბრენდის ფოტოსესიებში ვერ შეხვდებით ცნობად სახეებს ან ინფლუენსერებს, არამედ გულშემატკივრებს, ეს მესიჯია ბრენდისგან, რომ ბარსელონა ყველასთვისაა, ბარსელონა გულშემატკივრების ბრენდია.
რაც შეეხება კითხვას, შეცვალეს თუ არა მომხმარებელთან კომუნიკაციის სტრატეგია, რადგან განსხვავდება ესპანელი და ქართველი გულშემატკივრის ინტერესები, პასუხი მივიღეთ შემდეგი, რომ ისეთი გლობალური ბრენდის, როგორიც ბარსელონაა, მიდგომების შეცვლას, ვამჯობინეთ მომხმარებელი მოგვერგო ბრენდზე და ის იდენტობა, რომელიც ბარსელონას აქვს, მაქსიმალურად შეგვენარჩუნებინა.
რომ შევაჯამოთ…
ეს უკვე მასშტაბური ნაბიჯია, განვითარდეს ქართული სპორტული საბაზრო ეკოსისტემა, რათა მოიზიდოს კიდევ უფრო მეტი გლობალური ბრენდი, რადგან დავინახეთ, რომ პოტენციალი ნამდვილად არსებობს და რომ საქართველო საფეხბურთო ქვეყანაა. "მეტი ვიდრე მაღაზია" – ეს მხოლოდ სლოგანი არაა, ეს იმ რეალობის აღწერაა, რომელიც ქართულ ბაზარზე რეალურად განხორციელდა. ეს პროექტი გვაჩვენებს, რომ ლოკალური ინიციატივა და გლობალური ხედვა, სწორი სტრატეგიით, უნიკალურ სინერგიას ქმნის - და ამ სინერგიის ცენტრში საქართველოა.
ვიზუალებში გამოყენებული ფოტო მასალა ეკუთვნის ბრენდს და წარმოადგენს მათ ინტელექტუალურ საკუთრებას.